Shillong, Risaw 12 : Ki Pulit ka East Khasi Hills kan pynthikna ia ka jingpahara kaba khlain ha baroh ki jaka ban pynthikna ia ka jinglehniam Durga Puja kaba suk ba sain bad ka lait na ki jingkulmar ha Shillong, ong u Superintendent of Police Bah Vivek Syiem ha ka sngi Nyngkong.
“Ngi la pan shuh shuh ia ki Pulit ban pahara bad ngin pynthikna ban buh ia ka bor pahara kaba khlain ha man ki jaka” ong u bah Vivek.
Ula ong ba ka jingkhein ka dang iaid mynta ban pynthikna haduh katno ngut ki Pulit ba donkam.
“Ia mynta, ngim pat dep khein haduh katno ngut ki pulit ngin donkam. Ngi dang iakhein mynta, ngi dang don sa katto katne por. Ngi la pan shuh shuh ia ki bor Pulit bad ngin sa shong bishar ia ka jinglong jingman na ka por sha ka por” ula bynrap.
U SP u pyntip ba ia ki Pulit la pynbeit ba kin wan na kylleng ka Jylla, nalor ki CRPF kiba la don lypa.
Halor ka jingpynkhreh, u Bah Vivek ula ong ba ki sector officer kila ialum ia ka jingialang bad ki kynhun ba don bynta ban lah pyniaid beit iaid ryntih ia kane ka jinglehniam.
U pyntip ba lah dep pynmih ruh ia ka jingbthah ban pyndait ia ki kor CCTV bad ki lad jingiada na ka ding, haba pynleit jingmut halor ka jingtehlakam ia ki jingjia kum ka jingjah ki khynnah bad ki accident.
La bthah ruh ia ki Puja Committee ba kin buh ia ki volunteer, ki ban iarap lang ia ki Pulit Shillong Traffic ha ki pandal kiba heh bad ki jaka kiba kongsan, ula bynrap.
