Imphal, Risaw 11 : Khyndai ngut ki briew kila shah pyniap ha ka jingkhie thymmai ki jingjia umsnam ha ki hills district ka Manipur tang ha kine ki 12 kynta bala leit noh, kaba la pynmih ia ka jingiather kuli, jingwiang ding bad thombor ia ki iing ki sem bad ki dukan.
Kine ki jingjia kila jia ha Kamjong, Kangpokpi bad Ukhrul, kaba la pynsngewkhia jur ia ka jingsniew shaba palat liam ka suk ka sain hapoh ka Jylla.
Kane ka jingiaumsnam kala wan jia ha ka por ba u Myntri Rangbah Yumnam Khamchand Singh u dang iakynduh ia u Myntri Rangbah Duh ka Ri Narendra Modi ha New Delhi ha ka sngi Saitjain, ban iakren ia ki kam kiba ktah ia ka Jylla Manipur, kynthup ki kam pynroi ka Jylla bad ka jingialeh ban wanrah pat ia ka jingsuk bad jinglong ba jai jai.
Kane ka jingiaumsnam kala jia ruh hadien ka jingiakynad ba da ki bnai, kaba don jingiadei bad ka jingiakajia hapdeng ki Naga-Kuki, kaba la shim ia ka jingim jong kumba 22 ngut ki Naga bad 31 ngut ki Kuki naduh ba khie ka jingiaumsnam ha u bnai Rymbai, ong ka jingkhein bala kdew ha ka kaiphod halor ki kam iaumsnam.
Kaba pynmih ia ka jingiaumsnam ha ka sngi Saitjain ka dei namar ka jingiap jong ka Domkhonei Touthang, ka longkmie Kuki ba 42 snem ka rta myn ha ka miet sngi Thohdieng, kaba la jia hapoh ka shnong Chassad ha Kamjong District. Ka dei kawei na ka kynhun ba iakhih ban pyrshah ia ka jingpynpra ia ka jaka pahara ka shnong da ka kynhun ki Pulit Manipur, ka Indian Reserve Battalion bad ki Border Security Force (BSF).
Hadien kane ka jingjia, kala pynmih ia ki jingjia umsnam ha kylleng ki jaka ba kynthup ia ka jingiather kuli bad wiang ding, kaba la pynbor ia ki bor khmih ban pynjari ia ka hukum ka ain ha Kamjong. La pynbna ruh ia ka jingpakhang ia ka surok National Highway 202 ba khlem pud, kaba la wanrah ia ka jingsngewkhia halor ka iaid ka ieng ki kali sha ki jaka kiba shah ktah.
Ka Sorkar Manipur kala pynrem jur ia ka jingpyniap ia ki riew paidbah bad ka jingnang jur ki kam umsnam, katba ka jinglong jingman ka dang sniew ha baroh lai tylli ki hill district ka Jylla.
Ha kajuh ka por, u Kemchand Singh ha ka jingiakynduh bad u Modi, ula pyntip ia ka jinglong jingman jong ka Jylla bad pan ia ka jingiarap na ka Sorkar Pdeng ban leh eiei noh.
Ha ka jingthoh ha X, ka Ophis u Myntri Rangbah Duh kala pynthikna ia ka jingiakynduh ia u Kemchand Singh.
