Shillong, Risaw 09: U Treasurer ka NPP Meghalaya u Bah Daniel Thangkhiew ula ong, ba ka don ka jingpyrshang ban pynkhyllem ia ka sorkar jylla kaba ialam da ka NPP hynrei kane kan ym lah ban urlong bad ka kdew ba ka seng ka tylli mlon bad ka nang khlain.
Haba kren ha ka jingialap elekshon ha Mylliem kaba la pynlong da ka NPP Mylliem Block ha ka sngi Palei na ka bynta ban kyrpad ia ki paitbah ban ai jingkyrshan ia u Dr DRL Nonglait ha ka elekshon shiteng samoi jong ka MP Lok Sabha na Shillong Parliamentary Constituency, u Bah Thangkhiew ula ong, ba ki khubor lamler kidei kiba la pynsaphriang ba ka sorkar kan khyllem noh.
“Ki don bun ki bor kiba kwah ban pyntlot bad pynkhyllem ia ka sorkar kaba ialam da ka NPP, hynrei haba phi peit ia ki nongialam kiba shemphang kum u Myntri Rangbah, Bah Prestone Tynsong bad Bah Sniawbhalang Dhar, yn ym don mano mano ruh kiban lah ban pynkhyllem ia ki” ula ong.
Ula ong ba kila don ki hamsaia kiba la mih ha ki kot khubor bad ha ki social media kiba kam ba ka NPP kan sa khyllem hynrei kine baroh kidei ki bym don nongrim satia.
“Ki Symbud Myntri Rangbah ki jong ngi kila iakynduh ia ki lad pathai khubor bad pynshai ba kam don eiei kum katei. Nga trei ha Secretariat bad u Myntri Rangbah ka Jylla bad nga lah dep ruh ban kren ia ki nongpathai khubor. Ha kine ki khyndiat sngi kiba lah dep, baroh ki NPP ka MLA kila iakynduh lang ha ka iingsah jong u Myntri Rangbah bad ym don mano mano ruh kiba don jingthmu ban mih noh na ka seng” ong u Bah Thangkhiew.
Ula ong, ba u Myntri Rangbah ula lum ia ka jingialang man la ka bnai bad ki MLA ban iakren ia ki kam kiba la pyntrei ha ki Constituency bad kumta ki paitbah kim dei ban shah ialam bakla.
U Bah Thangkhiew ula kam ruh ba kadei tang ka seng NPP kaba la nang kiew ha ka jylla.
“Kadei tang ka NPP kaba la nang khlain katba nang mih ki sngi. Ka jingwan rung ki paitbah bad ki nongialam kadei kaba la sakhi tang ha ka NPP” ula ong.
Ula kyrpad ruh ia ki nongthep vote ka Mylliem, u Bah Thangkhiew ula kubur ba ka seng kala rem ha baroh 3 tylli ki elekshon hapoh jong kane ka Block, kaba kynthup ia ka Elekshon MP kaba iakhun da ka Kong Ampareen Lyngdoh, ka Elekshon MDC bad ka Elekshon MLA 2023 kaba la iakhun da u Bah Hamletson Dohling.
“Kane kadei ka sien kaba saw kaba ngi lah wan hangne. Nga ieng hangne da ka jingsngewrit ban kyntu ia phi ba ha kane ka sien kaba saw phin rai thikna bad ban ai ka jingkyrshan kaba pura ia u Dr DRL Nonglait. Ka pyrthei baroh kawei ka tip kiei ki kam kiba u lah dep trei, kaei ka kyrdan kaba u don bad kiei ki jingthmu kiba bha kiba u don” ula ong.
Ula ong, ba ka seng kala nang khlain ha Mylliem da ka jingwan pyniasoh u Bah Ronnie V Lyngdoh u MLA ka Congress sha ka NPP bad wat u kyrtong uba iakhun ia ka elekshon MLA ha u snem 2023 u Bah Gill Laloo ruh ula don lang ha kane kajuh ka rynsan.
“Ka Mylliem kala long kawei. Da ka jingwan u Bah Ronnie, ka jingdonlang u Bah Hamlet kala nang khlain shuh shuh. Ngi lah iakhun pyrshah ha ki snem kiba la dep, hynrei mynta da ka jingwan pyniasoh noh bad ka NPP kumta ka seng kala nang khlain shuh shuh” ula ong.
U Bah Thangkhiew ula ai khublei ruh ia u Symbud Myntri uba khmih ia ka tnad PWD u Bah Prestone Tynsong ha kaba iadei bad ki projek surok na ka bynta ki scheme bapher bapher ha Mylliem kiba la shimkhia bad buddien ruh da u Bah Hamlet Dohling kidei kiba dang iaid shakhmat.
Haba pynthikna ia ki nongialam ka seng ban ai ka jingkyrshan kaba pura, ula ong “Nga pynthikna ia u State President Bah Prestone bad ia u Kyrtong u Dr Nonglait ba ka NPP Mylliem Block kala nang khlain bad kan ai ia ka jingkyrshan kaba skhem bad kaba pura”.
Haba kynthoh ia ki seng ha ka liang pyrshah, ula ong ba kim don nongrim bad ishu shuh bad ki pyrshang ban pynbiej ia ki paitbah.
“Ngi dei ban iatylli bad ym dei ban shah ialam bakla ha ki khubor ha ki social media. Kiwei pat ki seng sain pyrthei kim don ishu shuh, ki dang wad ia ki ishu ban pynbiej ia u paitbah.
Hyrnei ngi long kiba shai kdar bad ki briew kiba sheptieng ia u Blei. Ka long ka kabu kaba khraw ban ioh ia u kyrtong kum u Dr Nonglait – u briew uba shemphang bad uba la tip bha ia ka pule puthi, uba don ruh ia ka kyrdan bad uba sheptieng ia u Blei bad udei ruh uba ai jingshakri ha ki kam u Blei” la bynrap u Bah Thangkhiew.
