Shillong, Risaw 9: Katba ka Byrnihat ka dang iai bteng ban paw kyrteng kum kawei na ki jaka kiba jaboh tam ha ka ri, ka Meghalaya State Judicial Academy (MSJA) kala shim ia ka jingiakhun pyrshah ia ka jingjaboh jong ka lyer shabar jong ka iingkashari.
Hapoh ka lama jong ka Meghalaya High Court ryngkat ka jingiatreilang bad ka Office u BDO Umling C&RD Block, Ri-Bhoi District, ka MSJA kala pynlong ia ka prokram kaba shi sngi “Right to Clean Air: From Statistics to Action” hynne ka sngi Thohdieng ha Multipurpose Hall, Byrnihat.
Ia kane ka prokram la pynlong halor ka jingsngewkhia jong kiba bun halor ka jingjaboh ka lyer ha ka thaiñ Byrnihat, kaba pynskhem biang ia ka kamram jong ki iingkashari ban kyntiew ia ka jingdon kitkhlieh na ka bynta ka mariang bad ia ka bha ka miat jong ka imlang sahlang.
Ka Director jong ka MSJA kong KM Lyngdoh Nongbri kala pynpaw ia ka jinglong kongsan jong kane ka sienjam bad ban jur ba kadei ka hok ban ioh ia ka lyer kaba khuid.
La sdang ia kane ka prorkam da kaba ioh ia ka jingkren na u Bah Eric Kevin Dkhar, BDO ka Umling C&RD Block, hadien kane la ioh ia ka jingkren na NI Dkhar, Deputy Director ka MSJA.
La pynlong ia ki jingiatai kaba la ialam da ka Meghalaya State Pollution Control Board. U Chief Environmental Engineer u Bah Wanshanbor R Kharkrang ula kren halor ka “Statistical Report on Air Pollution in Byrnihat” katba u Chief Scientist S Swer ula kren halor “Waste Management Rules, 2026”.
Ki kamram ban leh da ki shnong ki thaw kadei kaba la pynsngew da u dkhot ka “YoMariang” – the Environmental & Circular Systems Division of ISMG – uba la ai ia ka jingiakren halor ka phang “Role of Communities in Controlling Air Pollution and Innovative Approaches to Waste Management”.
Da kaba iaid shabar jong ka jingai jingkren, kane ka prokram kala jam ruh sha ka bynta jong kiwei ki kam kaba kynthup ia ka Students’ Hotspot Mapping, Waste Segregation Challenge, Waste & Pollution Detective Puzzle, ki video ai jinghikai halor ka jingjaboh ka lyer bad ki jaboh jabain bad ka jingsam ia ki Vehicle Waste Pouches.
