Yn shna ia 7 tylli ki Foot Overbridge ha Byrnihat. Umling, Nongpoh bad Umsning
Nongpoh, Risaw 09: U MLA ka Nongpoh Constituency bah Mayralborn Syiem, ha ka sngi Thohdieng, u la lum ïaka jingïalang bad ki Ophisar ha ka ophis u Deputy Commisioner ka Ribhoi, kaba iakren ia ki mat ban pynkylla sur ia ka surok Bah National Highway-06 ha Nongpoh, na ka bynta ka jingshngain ki paidbah ha ka leit ka wan.
Ha kane ka jingialang la iadonlang u Deputy Commisioner ka Ribhoi u Dr Abhishek Saini, U bah Jonathan Shylla ADM ba dei peit iaka tnad Revenue, General Manager ka NHIDCL, ki nongïalam naka Nongpoh Town Committee lem bad ki Rangbah Shnong naki shnong kiba marjan.
Haba kren sha ki lad pathai khubor, u MLA ka Nongpoh u bah Mayral Born Syiem u la ong ba kane ka long ka jingialang kaba kyrpang naka bynta ban pynwan dur thymmai ia ka surokbah bad ban pyntikna ba ka leit ka wan jong ki paidbah kan don hapdeng ka jingshngaiñ bad ka suk ka saiñ.
U la iathuh ruh, ha kane ka jingialang la iakren ban sdang noh iaka jingtei iaki 7 tylli ki foot overbridge kata ar tylli ha Byrnihat, kawei ha Umling, artylli ha Nongpoh, kawei ha Umsning Bye Pass bad kawei ha Mawleiñ Mawkhan bad ka kam ka la sdang ban iaid shait shait shakhmat.
U la iathuh ruh ba lada dang i donkam, dei ruh ban nang pynbun shuh shuh iaki foot overbridge ha kiwei kiwei pat ki bynta.
Nalor kata, u la iathuh ruh ba la ia kren ban pynbun shuh shuh iaka jingdon ki street light shaduh ka shnong Mawtnum kaba dang hap hapoh ka Nongpoh Town Committee bad ban shna ruh ïaka service lane shaduh Mawtnum khnang ba kan pynsuk iaki nongleit nongwan.
U bah Mayral Born u la iathuh ba la iakren ban buh ïaki median opening lane ki lad ki ban rung sha ki jaka kiba kham kongsan kiba don ha lynter jong u surokbah, nuksa kum ha Umling kaba don ka ophis Umling C&RD Block bad haka shnong Ïew-Mawlong kaba ju long ïew shisien shitaïew bad kumjuh ruh sha kiwei kiwei ki jaka katkum ka jingdonkam.
La iakren ruh ba dei ban don noh ki small median opening lane ki lad kiba rit haki bynta jong ka surokbah kaba don Service Lane ki ban pyniasoh sha ka surokbah khnang ba kan pynsuk iaki paidbah kiba leit ba wan.
U bah Mayral u la iathuh ba ki don ki kam kiba la sdang ban trei kum ka jingtei iaka foot overbridge ha Byrnihat bad ha Mawleiñ Mawkhan, hynrei kum u MLA un dang iai bteng ban buddien ban pyntikna ba kine ki kam kin iaid beit bad u la ong ba ia kine ki kam baroh ym pyndep noh ha u bnai Naiwieng lane u bnai Nohprah.
