Imphal, Risaw 9: Uwei u head Constable ka Rapid Action Force (RAF) u la mynsaw hadien ba ki briew ki bym lah ban ithuhm ki la kawang da u bom grenade ha ka khyrdop jong ka ktem B/107 RAF ha New Lambulane, Imphal East, ha ka miet sngi Palei.
Katei ka jingjia ka la jia ha ka por kumba 10 baje eiei mynmiet ha ki jaka ba hap ha Porompat police station.
Une u pulit uba la mynsaw u dei uba la tip kyrteng kum u Dhananjay Rai uba dei u head constable na Uttar Pradesh.U la mynsaw malu mala bad la iathuh ba u khlem da lei lei than eh.
La pynkit ia u Rai sha Jawaharlal Nehru Institute of Medical Sciences (JNIMS) Hospital ban ioh ia ka jingsumar.Ka Northeast Live TV, ka iathuh ba utei u briew, u don ha ka jingkoit jingkhiah, katba ki khubor kiba kham hadien, ki iathuh ba la pynkynriah noh ia u, sha Shija Hospital.Ia ki jingtip ba bniah shaphang ka jingsumar jong u ym shym la lah ban pynthikna da lade.
Hadien katei ka jingshah thombor, ki Pulit ka Porompat bad ki bor pahara ki la ker kut ia katei ka jaka bad ki la pynlong ia ka jingthwet ban lap ia kiba donkti.Ki pulit ki la jurip ruh ia katei ka jaka bad pynlong ruh ia ka jingkhynra ha ki jaka ba marjan.
Ym pat lah ban tip ia ka jingthmu jong katei ka jingshah thombor bad ia ka jinglong jong ki nongthombor.Ym shym la don ba shah kem, bad ym shym la don kano kano ka kynhun lehnoh kaba la shim ia ka jingkitkhlieh halor katei ka jingjia haduh ka step jong ka sngi Thohdieng
