Shillong, Risaw 09 : U Nongialam ka BJP bad MLA ka Pynthorumkhrah Bah AL Hek ha ka sngi Thoh dieng, ula ther kylla ia ka jingkynthoh u Symbud Myntri Rangbah Bah Sniawbhalang Dhar ba “kam lok’, haba pynpaw ba kum kane ka kyntien ka phah ia ka khubor ba bakla sha ki samla mynta.
Haba kynthoh ia ki jinkgren u Bah Sniawbha, u Bah Hek ula ong “Kaei kaba kren da u Symbud Myntri Rangbah Bah Sniawbhalang Dhar, Nga la iohsngew la arsien bad iohi la arsien. U khlem pynpaw eiei ba long beit beit ia nga, hynrei ula kren ia ka ha ka jingiakynduh bad ki lad pathai khubor hynnin ka sngi. U ong “Kam lok jong me”, u ong sha ki nongpathai khubor, ula kren sha kito kiba kylli jingkylli ia u”.
U Bah Hek u ong ba un jin da jubab da kumwei lada dei ba ka jingkynthoh ka long beit beit ia u.
“Lada u kren ia nga beit beit, nga tip kumno ban leh. Hynrei namar u khlem ong beit beit ha nga, ngam don eiei ban kynthoh ia ka. Hynrei ka jingkren kaba ula kren, ka long beit ia kaei kaba ngi hikai sha ki pateng ba dang wan” ula ong.
“Kaei kaba ngi hikai sha ki khun jong ngi, kaei kaba ngi hikai sha ki GenZ jong ngi ?. Kumta ngi hap ban phikir bha hashuwa ban kren. Kano kano ka kyntiew ha ka interview, ban ai ia kum katei ka jingkren ka phah shisha ia ka khubor kaba bakla sha ki pateng ba dang wan” ula bynrap.
Halor ka jingkren u Symbud Myntri Rangbah Bah Prestone Tynsong, u Bah Hek ula ong “Nga khlem pat pule ia ka jingkren u Bah Prestone, hynrei ka dei ka jingsngew jong u shimet. Ngam don eiei ban ong ia kaei kaba nga khlem iohsngew”.
U Bah Sniawbha ha ka sngi Palei, haba khein kam kai ia ka jingkam u Bah Hek ba bun ki MLA ka NPP ki kwah ban iasoh BJP, ula ong “Lada phi kam trai ia ka kurim kiwei, kumno phin sngew?”.
