Shillong, Risaw 09: U Symbud Myntri Rangbah ka jylla u Bah Sniawbhalang Dhar ha ka sngi Palei u la weng woh ia ka jingkam trai halor ka jingpynrung ia ka ktien Khasi ha ka Eighth Schedule da kaba pynskhem ba ka sorkar ka pynleit jingmut ban pynioh, ym ia ka jingpynbna paidbah.
Haba jubab ia ki jingkynnoh bad ki jingkynnoh pyrshah halor mano ba dei ban ioh ia ka burom namar ba la pynkhih ia ka jingdawa, u Bah Dhar u la ong, “Ngi dei ki nongtrei, ngi dei ki nongleh, ngin long kiba kmen ba lada uno uno uba ioh ia ka burom katba ki paidbah ki sngewbha, ngim shong ha ka secretariat ban ialeh ban ioh ia ka burom, ngi shong hangta ban leh ia kaba donkam khnang ba ki paidbah kin ioh ban im ha ka suk ka sain.”
U Bah Dhar u la ong ba baroh ar kata ka ILP bad ka ktien Khasi ki don ia ka jingkyrshan lang jong ka iing dorbar bad ka jingbuddien ka dang iaid shakhmat da ka sorkar.”
Halor ka ILP, baroh ki 60 ngut ki MLA ngi la mynjur da ka resolution hapoh ka iing dorbar, dei na kata ka daw ba u myntri rangbah ka jylla u dang shu leit ha kine ki bnai ba la dep ban kyrpad ia ka sorkar India, halor ka ktien khasi ruh la mynjur ia ka resolution hapoh ka iing dorbar, kane ka jingbuddien ka long kaba ngi leh hi,” u la ong.
Ha kaba iadei bad u dewiong u symbud myntri rangbah u la ong ba u Myntri Rangbah ka jylla u Conrad K Sangma bad ka sorkar kim shym la shong kli kti bad ha kine ki khyndiat sngi u Conrad u dang wan na Delhi ban buddien ha kaba iadei bad kane ka mat, u la ong.
