Shillong, Risaw 13: U Nongaiktien jong ka Expert Committee u Nababrata Bhattacharjee hynne ka sngi ula ong, katba ym pat lah ban shimkhia iaka wah Umshyrpi bad Umkhrah yn ym lah ban leh eiei ha kaba iadei bad ka jingiada ia ka Pung Umiam.
U Naba ula ong, kitei ki ar tylli ki wah ka Umshyrpi bad Umkhrah ki iaid lyngba ka nongbah Shillong bad kine ki iatyngkhuh lang bad ki tuid sha ka pung Umiam bad kine ki ar tylli ki wah kidei kiba la paw nam haka jingjaboh bad kumta ka pung Umiam ruh ka kylla jaboh lang.
U Bhattacharjee ula ong, ka pung Umiam mynta kala kylla long kaba nyngkong eh kum ka Soptik Tank ha ka ri kaba ai jingshakri iaka nongbah Shillong baroh kawei bad ki jaka kiba don harud wah ne ki Catchment Area kaba don 220 Square Kilometre.
U la pynkynmaw ruh ba ha ka kaiphod kaba ula aiti ha ka ïingkashari Meghalaya High Court, u la kdew iaka jingdonkam ban pynneh pynsah iaka pung Umiam.
“Ngi la phah ia ki jingai jingmut ha kaba iadei bad kitei ki bynta bad lada don kano kano ka jingtei, dei ban shimkhia ia ki jaboh jabain kiba tuid lut sha ka wah bad ki don ruh kiwei kiwei ki bynta kiba donkam ban shimkhia” ong u Bhattacharjee.
