Shillong Risaw 13: U MLA ka Jirang Constituency u Bah Sosthenes Sohtun ula ai khublei iaka sorkar jylla khamtam ia u Myntri ka tnad Taxation u James PK Sangma uba la pynbna ban pynduh pyndam noh iaka jingthmu ban buh iaka ktem khalai Casino bad iaka ain Khalai ne ka Meghalaya Regulation of Gaming Act, 2021.
“Nga pynpaw ka jingsngewnguh ia ka sorkar jylla kaba la ialam da u Myntri Rangbah ka jylla u Conrad K Sangma kumjuh ia u Myntri ka tnad Taxation u James PK Sangma uba la rai ban phah pynduh pyndam noh iaka aiñ khalai khamtam ban buh iaka jaka khalai Casino ha ka constituency ka jong nga” ong u Bah Sohtun.
“Naduh ba sdang nga la iakren bad ki nongialam balang, ka Synjuk ki Rangbah Shnong ka Ri Bhoi District, ki sengbhalang bad kiwei kiwei ki nongialam bad ngim sngew iahap ban don iaka Casino haka thaiñ ka jong ngi. Kum u MLA haba nga iohi iaka jingpynbna u Myntri ka tnad Taxation ban pynduh noh iaka aiñ khalai, nga dap da ka jingkmen namar naduh ba sdang ngim iahap ban buh iaka Casino haka thaiñ bad haka District ka jong ngi” ong u MLA ka Jirang.
U la pynpaw iaka jingsngewnguh iaka sorkar jylla kaba la sngap iaka jingpynpaw bad jingpynsngew jong kiba bun balang bad ki kynhun bapher ki bym kwah ban buh iaka Casino.
Haba kylli ba ka jingkynrandien jong ka sorkar ban iaid shakhmat bad ka jingthmu ba nbuh iaka Casino kadei namar ka jingjur jongka jingpyrshah na kiba bun ki liang, u Bah Sohtun ula ong “Haka riti synshar paidbah, ka sorkar jong ngi naduh ki nongialam kiba hakhliehduh ki shim beit iaka jingpynsngew jongki paidbah, khamtam ia ki Synjuk ki Rangbah Shnong, Sengbhalang bad ki nongialam niam kiba la mih shakhmat ha kaban pyrshah ban buh iaka Casino. Ngam ong ba ka sorkar ka shah pynbor hynrei nga sngewkmen ba ka sorkar ka sngap ia kaei kaba ki paidbah, ki nongialam niam, ki rangbah shnong baroh bad ki seng bapher ki pynsngew bad iaka jingai jingmut na baroh ki liang”.
U Bah Sohtun ula ong, watla ka sorkar kala rai ban phah pynduh pyndam noh ia katei ka aiñ khalai hynrei kum u MLA yn iai buddien bad ban kren iaka sorkar ba kan ym don shuh hadien habud ia katei ka jingthmu, namar kumba long mynta ki paidbah kim pat pdiang.
