Shillong, Risaw 7: U Nongialam ka BJP bad MLA ka Pynthorumkhrah u Bah AL Hek ha ka sngi Balang ula ong, ba ki MLA na Garo Hills bad Khasi Hills, kynthup ia kiba na ka seng NPP, kila long kiba kloi ban pyniasoh noh bad ka BJP hynrei kim shim la don pat ia ka nombar ban lait na ka aiñ shah mait kyrteng.
Halor ki hamsaia ba ki MLA ka NPP kin leit pyniasoh sha ka BJP, u Bah Hek ula ong, “Man la ki seng sain pyrthei la ka long kano kano ka seng ruh kin hap ban tehsong ia la ki jong. Lem kumta wat na ka kynhun ka jong ki ruh, kila iai bteng ban phone ia ngi ban pyniasoh noh sha ka BJP hynrei tang kawei ka jingeh kadei na ka jingbym don nombar, dei na kane ka daw ba kim lah ban pyniasoh bad kin hap ban iaid lyngba ka ain shah mait kyrteng”.
U Bah Hek ula ong ba ula ioh pdiang bun tylli ki phone call man la ka sngi. “Nga ju iohi phone call um duna ia ka 4-5 tylli na kylleng ki bynta jong ka Meghalaya. Don kiba la phone na Garo Hills, na Sohiong, West Khasi Hills, Jaintia Hills, Ri-Bhoi. Man ka sngi nga ioh phone call 4-5 tylli. Kine ki briew ki kwah ban wan da ka kynhun ban pyniasoh noh sha ka BJP” ula ong.
Ka jingkhang jong ka BJP ka long kaba plie, “Ngim don satia kano kano ka jingeh namar ba ka jingkhang kadei kaba la plie lut bad kito kiba don ia ka jingthrang ha kaban pyniasoh bad BJP kin shah pdiang sngewbha bad ngi don hangne ban iatreilang bad ki”.
“Nga lah ioh pdiang ia ka phone call na ki MLA na Garo Hills, na baroh ki seng sain pyrthei hynrei ka jingeh ka dei ba kim don ia ka nombar ba kin kynriah seng noh. Nga ong ia phi, ba kila long kiba kloi hynrei tad haduh ba kin don ia ka nombar kaba biang ba kin lait na ka jingshah pynngat ha ka ain kyntiap seng, ki lah long kiba kloi ki MLA ban pyniasoh. Nga ong ia phi, kine ki MLA kidei na ki seng sain pyrthei ki bapher bapher na Khasi Hills bad Garo Hills”.
U Bah Hek ula ong, “Ka bor kan wan bad ka bor kan leit, ka bor kan ym lah ban neh slem sah. Phi phin iohi beit ia ka bor ba kan don bad phin iohi ruh ha ki katto katne snem kan don ka jingkynthoh pyrshah ia ka sorkar kaba mynta. Kumta ngim dei ban pyrkhat beit barabor ia ka bor, ka bor kam dei kaei kaei kaba phi lah ban im shi rta. Ban im shi rta kadei ban im na ka bynta ki parabriew, phi hap ban burum iano iano ruh bad dei da kumne phin imlang bad ka bor”.
“Ka jingleh baheh, kadei kaba phin ym lah ban noh slem ha ka bor. Ngi lah iohi bun ngut ki nongialm ha ki por kiba lah dep kiba la leh baheh bha, ki bym pdiang ia ka jingkdew ba ki leh bakla, kiba sngewsarong, ngi lah iohi ba kila khyllem noh. Kata kadei kaba nga lah sakhi ha kine ki 30 snem ha ka kam politik. Nga lah iohi lut, ia kito kiba ki khot ka jingshisha ne ia ka drama ne wat ia ka rynsan ak (theatre) ruh. Nga ruh nga dei uwei na ki tyngshop (actor) ha ka drama” ula ong.
Haba pynshai shuh shuh, u Bah Hek ula bynrap, “Nga ngam ong, ba ka jingleh baheh ka don ha ka seng, hynrei kadei kaba don tang ha ki riewshimet. Balei phin kynnoh ia ka seng? Ka seng kam dei kaba leh baheh. Nga ngam kynnoh la kadei ia ka Congress ne BJP ne TMC, ne NPP ne UDP. Kam don kano kano ka jingleh baheh na ka liang ka seng, ka jingleh baheh kadei beit na ki riewshimet”.
“Kane kadei ka jinglong kaba ju jia, ngim lah ban kiar iaka. Nga lah iohi ia ka Sorkar UPA ha ka bor, ngi lah iohi ia ka Sorkar NDA ha ka bor, ngi lah iohi bun ngut ki Myntri Rangbah kiba don ha ka bor, kila don hangtei tang shipor bad kim shim la lah ban synshar shirta. Dei na kane ba ka bor ka don bad kan don ruh ka jingkynthoh pyrshah. Phim lah ban ong ba phin synshar shi rta” ula ong.
