Shillong, Risaw 07: Ha ka jingpyrshang ban pynkhlaiñ ïa ka jingïatreilang jong ki paidbah bad ki pulit, ki pulit ka West Jaiñtia Hills District ki la pynbna ban pyntreikam da ka QR Code ban ailad ïa ki nongshong shnong ban pyntip ïa ki kam beaiñ khlem da pynpaw kyrteng.
Kane ka jingthmu ka long ban pynsuk ïa ka jingpyntip bad kaba khlem da donkam ban pynpaw iaka kyrteng ki nongujor.
Ka kyrwoh u Superintendent of Police (SP) ka West Jaintia Hills ula ong ba ka QR Code kan pynsuk ban ai jingtip ia “kino kino ki kam beain ne ki kam runar, ka jingwan rung tuh jong ki briew sha kane ka Jylla, ne ka jingleh bym suidniew jong ki pulit.
La kyntu ia ki nongshong shnong ban pyndonkam ia ka QR Code khlem da tieng ban shah pynpaw pyrthei iaka kyrteng.
La kyrpad ia ki paidbah ban scan bad pyndonkam ia ka QR Code ban ai jingtip ne jingujor khlem da pynpaw kyrteng. Ia ka jingtip jong ki nongujor yn buhrieh” la ong u SP.
Ki pulit ki la pan jingiatreilang na ki paidbah ban pynneh ia ka suk ka sain.
“Ngi pan ia ka jingiatreilang na ki paidbah ha kaba pynneh ia ka ain bad ban pynthikna ia ka jinglong jingman kaba shngain na ka bynta baroh,” bynrap u SP.
