Shillong, Risaw 07 : Hadien ka jingduh kaba shu salit ha ki ar samoi ialehkai ba la dep, ka Mawlai Sports Club ka la rah biang ia ka nam lahduh ka Shillong Premier League 2026 kaba la wan hadien ka jinglah ban pynliem kput ia ka Rangdajied United Football Club da 5-0, ha ka jingiakhun ba long hynne ka nohphai sjgi ha SSA Stadium, Polo.
Wat lada ka Mawlai ka la pyntikna ba kan long ka lahduh kane ka lympung, hynrei kat kum ka prokram ialehkai, dang don sa saw tylli ki jingiakhun ba dang sah jong kane ka lympung. Hynrei na bynta ka Mawlai, kane ka jingiakhun ka dei kaba khatduh ia ka bad ioh ban khur pura 21 point.
Tad haduh ba kut ka kylla step, ka Mawlai SC ka la lah ba kan tam lypa shakhmat da 3 kol ia kaba la ioh ban thep ia ki da u Basuklang Bina (13’), Arkini Laloo (16’) bad Fairming Suting (22’), bad ha ka kylla miet ka la bteng ba kan ioh thep biang sa artylli ki kol ba la wan lyngba u Damanbhalang Chyne (83’) bad Ricky Chyne (90’).
Ka lynti iaid ia ka Mawlai ha kane ka samoi ialehkai kaba mynta ka long ba kam shim la shah rem wat tang shisien ruh kaba wan hadien ba ka la khur haduh 6 tylli ki nam jop bad iakhaid lai sien bad ba ka la shah thep ruh tang ar kol bad ioh thep pat 17 tylli ki kol.
Kum ka kynhun ka Mawlai SC ka la ioh ba kan rah ia ka nam ha ka samoi ialehkai 2022 bad 2023, kaba hadien kine ki ar samoi, kum ka kynhun ka la don hapdeng ka thong ban dang rah biang, ia kaba ka la shu duh salit bad dei tad hynne ka sngi, ba ka kynhun ba la ialam da u bah Hering Shangpliang kum u coach ba kan ioh ba kan rah ia ka nam kum ka lahduh.
Hynrei kaba pynkyndit ka long ba ha ka jingiakhun ba mynta ka sngi , lada yn ia khmih ia ka thup ialehkiai (player list) Rangdajied United FC, kato katne na ki khynnah ialehkai kiba kham paw ki la don pynban ha ka ben shong (substitute), ia kaba la sei bujli pat ia ki tad haduh ba kylla miet.
U sawar ka nam ialehkai kaba bha bad ba la kham tbit ym lah ban len ba u noh bha sha ka kynhun ialehkai ka Mawlai, katno tam lei lei ia ki one touch pass kiba sted, kaba da kynjoh sha katta ka kyrdan kaba kham shalor bha.
Marsein ia sdang, ki khynnah ka Rangdajied United FC ki la kham iakhun tyngeh bad ban ialeh ban nion shakhmat, namar ha kum kane ka por, ki rang ialehkai ka Mawlai kim pat la pynskhem ia la ka rukom ialehkai ka jong ki.
Hynrei ym slem haba ka jingiakhun ka la sdang ban jam shakhmat, ba ki rang ialehkai ka Mawlai ki la lah ban ioh ban kham bat ia ka bol ha ki bad ruh ban ia pashat kham sted ia ka bol bad ia mir jingmut bha hapdeng ki para player ha madan.
Ki lai tylli ki kol kiba ka Mawlai SC ka la ioh ba kan thep ki long lyngba ka jinglah ban ioh rah syndet kloi lan shakhmat, kaba pynkyndit ia ki rang ialehkai dien ka Rangdajied bad katba kin da lah ban khanglad, ki rang ka Mawlai ki la lap ba khyrwit ia ka bol kaban pynkhih ia ka jar.
Ka jinglah ban tam kloi shakhmat da lai kol tang ha ka kylla step, ka la sdang ba lyngshop bor bah ia ka Rangdajied United FC.
Haba wan ban bteng ia ka kylla miet, ka Rangdajied United ka la rai ban sei bujli kato katne ki player, kum shi bynta ban plie lad ia ka kynhun ba kan iai don ha ka thong jong ka jingiakhun, hynrei ka Mawlai SC, ka jinglah ban tam lypa pat da lai kol, ka la lam pynsuki bha noh ia kane ka jingiakhun.
Hynrei kumba shiphew minit shwa ba ka jingiakhun kan jam noh sha kaba kut, ka Mawlai SC ka la ioh ba kan thep biang ia ki artylli ki kol ba dang sah ki jong ka, ban pyntikna shi syndon ba mynta ka samoi ka nam lahduh kan dei beit ka jong ki.
Haba shim kyllum, kane ka nam lahduh ba ka Mawlai SC ka ioh ba kan rah mynta ka samoi, kadei ka jinglah ki player ban iai pynneh ia la ka rukom ialehkai, kaba khlem lah ban khlem da pynshad kmen ia ki player bad ia ki nongkyrshan jong ka Mawlai, kaba ia ka trophy jong ka nam lahduh kin sa pdiang ha ka sngi ba pynkut syndon ia kane ka smoi ialehkai
Wat la ka Mawlai SC ka la ioh ba kan rah ia kane ka nam lahduh ka SPL, ki khmat pat mynta kan phai pat sha ka lympung iakhun ka SSA Super Cup, kaba hangne ki Top 6 Club, kin khreh ba kin iakhun ban rah ia ka nam lahduh.
Lashai ka sngi, ka jingiakhun kan long hapdeng ka Sawmer SC pyrshah ia ka Mylliem SC kaba la buh ban long ha ka por 3 baje nohphai sngi.
