Shillong, Risaw 7: U Nongialam ka BJP bad MLA ka Pynthorumkhrah u Bah AL Hek ha ka sngi Balang ula pyniasoh ia ka jingjur jong ka jingkiew ki kam runar ha ka jylla kadei namar ka jingjyllei u droks bad ka ong, ba ka sorkar MDA kadei ban shim ia ka jingkitkhlieh kaba pura ban rat dyngkhong ia kane.
“Ki don bun ki jingjia jong ki kam sniew namar ba ki briew kila pyndonkam ia u droks. Ka long kaei kaei kaba ma bha” ong u Bah Hek.
“Kum ka Sorkar MDA, u Myntri Rangbah bad u Myntri ka Koit ka Khiah kidei ban shim ia ka jingkitkhlieh ban tehlakam ia u droks bad ia ki kam sniew kiba la jia. Ym shuh tang kawei ka longiing mynta, bun ki longiing bad ki kmie ki kpa kila mad ia ka jingeh kaba khraw haba ki iohi ba uwei na ki dkhot jong ka longiing ula dih droks. Kumta kane ka long kaba ma bha ia ka imlang sahlang kaba ngi shong ngi sah. Dei na kane ba bun ki kam sniew kila iai jia” ula ong.
Une u MLA ula ong, ba ia kane lah ban sakhi ha kylleng ki bynta jong ka jylla.
“Ki don bun ki kam sniew kiba la jia ha kylleng jong ka Meghalaya. Ngi lah iohi ruh dang shen ia kaei kaba jia ha Nongmynsong, ka Constituency ka jong nga, kiwei pat ki Constituency bad kiwei pat ki bynta jong ka jylla Meghalaya. Kane kadei kawei na ki dawbah jong ka jingmih ki kam sniew na ka jingjyllei u droks” ula ong.
Haba kylli kaei kaba dei ban leh, u Bah Hek ula ong, “Ka Sorkar kadei ban shim pura ia ka jingkitkhlieh ban pynthikna kumno ban rat dyngkhong ia ki mat kiba iadei bad u droks ha Meghalaya.”
“Ki sienjam kiba ngi kwah ban ai jingmut, ka long ban iatreilang bad ki Dorbar Shnong, ki Volunteer jongki Dorbar Shnong, lada lap ia kino kino kiba pynmih ia ki jingklumar namar ka jingkyrni droks, ngi dei ban leh ia kaba donkam bad ngi hap ban iakhun ia kane ka jinglong jingman. Nga ngam ong, ban pynshitom tyngeh pyrshah ia ki hynrei dei ban pynthikna ba kim dei ban bteng biang ia kum kine ki jingkyrni ha ka jingdih droks”.
“Ngi hap ban long kiba phikir kum ma ki hi, tang namar ka jingieid paralok, ki kylla long kiba ngop ha u droks ha ka jylla Meghalaya. Kumta ngim lah ban kynnoh ia kiwei pat hynrei kadei ka kamram jong ki kmie ki kpa kiba don ia ka jingkitkhlieh bad ki nongshong shnong kiba don ia ka jingkitkhlieh bad ka Sorkar kaba don ia ka jingkitkhlieh ban tehlakam ia ka jingkyrni droks bad ruh ban pynkut ia kine ki kam sniew kiba donbynta da ki briew kiba kyrni droks” la bynrap u Bah Hek.
