SHILLONG, Risaw 13: Ka MLA jong East Shillong ka kong Ampareen Lyngdoh bad u MLA ka West Shillong u bah Mohendro Rapsang hynne ka sngi kila kynduh ia u Chief Secretary (CS) u bah D.P Wahlang ban iakren halor ka jingkyrduh um hapoh ka thain Laitumkhrah, Nongthymmai bad Mawprem.
Haba kren sha ki lad pathai khubor ka kong Ampareen kala iathuh ba ha kine ki sngi ki paidbah ka thain Laitumkhrah ki shem jingeh bha namar ka jingkyrduh um bad kane ka ktah bha iaki paidbah khamtam kito ki longïng ba duna haka ioh ka kot.
Ka kong Ampareen kala iathuh ba ka jingslem ban pyntrei iaka projek sam um ka Greater Shillong Water Supply Scheme (GSWSS) Phase-III ka buh jingeh bha iaki paidbah ym tang hapoh Laitumkhrah hynrei lah ban ong ha baroh kawei ka nongbah Shillong namar iaki shnong hapoh ka nongbah la mang ban ioh um lyngba kane ka skhim.
Kala iathuh ba haka jingialang ki ophisar ka tnat PHE kila pyntip ba naka liang ka tnat ka dang pynkhreh bad ka dang iaid shakhmat ban pyndep noh ban thep iaki Pipe um kiba dei lyngba ka skhim GSWSS naka bynta ban pynpoi um sha man ki longing.
“Wat nga kum ka MLA nga donkam ban siew haduh T.12 hajar hapoh lai taiew ka bai um, te pyrkhat phi kaei ka ban jia iaki paidbah khamtam kito ki longing kiba duna haka ioh ka kot ne ha ka kamai kajih” la ong ka kong Ampareen.
Ka kong Ampareen kala ong ba naka liang ka Shillong Municipal Board (SMB) kala kular ban peit bad ban maramot iaki Pipe um kiba la pipe ne sarang ha kylleng ka nongbah Shillong bad kumjuh ruh naka liang ka tnat PHE kala kular ruh ban tei thymmai haduh 5 tylli ki jaka pyllang um (Tank) thymmai hapoh ka nongbah Shillong.
Kala ong ba ka long kaei kaei lehrain ba watla ka jylla Meghalaya kadei ka jylla kaba jur bha u slap hynrei ki thliew ïng hapoh ka nongbah Shilong kim ioh um satia bad dei namar kane ka jingialang mynta ka sngi kadei thik ban iakren naka bynta ban pynthikna ban pynpoi um ha man la ki tyllong ïng.
“Naka liang ka sorkar ruh kala kular ha ngi ba kan shim khia ban pynbeit ia kane ka jingkyrduh um hapoh 2 ne 3 taiew khnang ban pynthikna ba ki longing hapoh ka nongbah baroh kawei kim dei ban kyrduh um” la ban biang ka kong Ampareen.
Nalor kane ka kong Ampareen kala kyntu ruh iaki paidbah ha kylleng ka nongbah Shillong ba kidei ban sumar bha iaki pipe um bad kidei ruh ban pyntip ha ki tnat treikam lada don kano kano ka jinglait kai ki pipe um khnang ba ki tnat badei khmih ia kane kin leh iaka ba donkam.
