Shillong, Risaw 07 : U Myntri Rangbah Conrad K Sangma ha ka sngi Ba-ar ula kren shai ba ka Sorkar Jylla kan nym shim satia ia kano kano ka rai ba marwei halor ka Block I bad II bad ia kano kano ka sienjam ba shakhmat yn sa shim hadien ka jingiasyllok bad ki kynhun ba don bynta ha ka kam.
Haba kylli la ka Sorkar kan pynbor ia ka jingleit pynshisha dalade ia ki jaka bala kdew ha ka jingpynbna u snem 1951 kaba la pynkynriah ia ka Block-I bad II na Jowai sha ka United Mikir and Cachar Hills district shuwa ban sdang ka jingakren, u Conrad ula ong baroh kine artylli kin iaid lang ryngkat ryngkat.
“Ngin khmih ia baroh ki bynta. Ka jingiakren kan iai bteng. Hynrei katba ki jingiakren ki dang iaid ban lah pynbeit, ngin pynthikna ruh ia ka jingiasyllok bad baroh ki kynhun ba don bynta” ong u Conrad.
Ula pynpaw ba ka nongrim jong u ka dang iai long beit kajuh halor kane ka kam.
“Kano kano kaba ngi leh kan long beit ha ryngkat ka jingiasyllok bad ki kynhun ba don bynta, bad ki paidbah. Ngin ym jam shakhmat khlem da pynthikna ia ka jingiasyllok, jingkyrshan bad jingmynjur lang ban lah pynbeit ia kane ka jingeh” ong u Myntri Rangbah.
U Conrad ula ong ba ka Block-I bad II ka dei kawei na ki jingeh ba tasam tam ha ka jingiapynbeit pud.
“Kane ka dei ka jingeh kaba tasam bad ba hap leh phikir bha. Ha ki snem bala leit, kiba bun ki Sorkar kim nud ban ktah ia ka. Dei tang ka Sorkar ba ialam ka NPP kaba la pyrshang ban iapynbeit noh ia ka” ula ong.
“Kam long kaba suk, hynrei lada ngi iatreilang bad ioh ia ka jingmynjur jong baroh, ngin sa lah ban pynbeit ia kane ka jingeh” ula bynrap.
