Shillong, Risaw 07: U Myntri Rangbah ka Jylla Conrad K Sangma ha ka sngi Ba-ar, u la ong ba ka pla tyngka jong ka Meghalaya ka long kaba biang bad u la kyntu ban nym pyniasnoh ia ka pla tyngka jong ka Jylla na ka jingsahkut ka pisa pilain ka skhim Jal Jeevan Mission (JJM).
“Ka jinglong jingman ha ka liang ka pla tyngka jong ka Jylla mynta ka long kaba biang. Kam don kano kano ka jingsngewkhia haba iadei bad ka jinglong jingman ha ka liang ka pla tyngka jong ka jylla” la ong u Conrad.
U Conrad ula ong baka pla tyngka jong ka Jylla, lyngba ka khajna jong ka Jylla hi, ka bhah khajna naka Sorkar Pdeng, ki skhim ba la kyrshan da ka Sorkar Pdeng, ki jingai jingiarap na ka Sorkar Pdeng bad ki ka pisa naki externally aided project la pyndonkam da ka jingkitkhlieh naka bynta ban kyntiew ia ka roi ka par jong ka Jylla.
Halor ka pisa ba sahkut haba iadei bad ka skhim JJM, u Myntri Rangbah ula ong ba katei ka mat ka dei kaba iadei bad ka rukom treikam jong ka Sorkar Pdeng.
“Ka JJM ka dei ka projek mission mode kaba la bei tyngka 90:10 da ka Sorkar India. Namar ba ka dei ka projek mission mode, hadien san snem ba la buh por ban pyndep, ka jingbei tyngka ka la sahkut noh. Ka la donkam ia ka jingmynjur jong ka kynhun Myntri Sorkar Pdeng ban pyntreikam biang ia ka mission” u la ong.
U la bynrap, “Kata ka jingïapher hapdeng ka por jong ka mishon kaba la kut bad ka jingpynrung biang ïa ka ka kynhun myntri ka la pynlong ïa ka jingpynslem ban pyllait pisa. Ka tnad pla tyngka kam shym la lah ban pyllait pisa namar ba ka por jong ka mishon ka la kut bad ka kynhun myntri kam shym la shim rai ban pynjlan por. Kane ka dei ka mat kaba ïadei bad ka projek bad ka mishon.”
U Myntri Rangbah u la ong ba mynta ka Sorkar Pdeng kala wanrah ki lad lynti kumno ban pyniaid shakhmat ban pyllait pisa naka bynta ka skhim JJM.
“Nga sngewkmen ban pyntip sha phi ba ka kynhun Myntri Sorkar Pdeng mynta ka la mynjur bad mynta ka mission ka dang bteng,” u la ong.
U Conrad ula ong ba la buh ia ki kyndon ba thymmai da ka Finance Ministry na ka bynta ka tnad Jal Shakti daka ba bthah ba Jylla kidei ban bud ryntih.
“Ka Meghalaya mynta ka la pyndep ia jan baroh ki kyndon bad ia ka bynta ba nyngkong jong ka pisa la thmu ban pyllait noh bad kane kan iarap ia ngi ban pyllait ia ka pisa sha kito kiba pyntreikam iaka JJM,” u la ong.
“Kane kam don jingiadei ei ei bad ka jinglong jingman jong ka pla tyngka jong ka Meghalaya. Ka jingsngewkhia haba iadei bad ka pla tyngka kadei tang ha ka skhim JJM,” u la bynrap.
