Nongpoh, Risaw 13 : Ka Khasi Students Union(KSU) – North Khasi Hills hynne ka sngi palei kala leit ai song jingiarap ia ki ar ngut ki samla na Ri Bhoi District ki la ioh ban mihkhmat ïa ka India sha ka 43rd World Arm Wrestling championship kaba long ha ka ri Turkey.
Kane ka World Arm Wrestling championship ka dei ka lympung ïakhun kti ka ban sdang naduh ka 14 tarik u Risaw haduh ka 23 tarik u Risaw ha ri Turkey bad na Ri Bhoi District ki don ar ngut ki nongïakhun kti ba la paw kiba kynthup ïa ka Kong Margret Pathaw na Umsning bad u Samla Banshanlang Terang na ka Shnong Umlakhar ha kaba kine ki ar ngut ki mih khmat ïa ka Team na India sha katei ka lympung ïakhun kti jong ka pyrthei.
Na ka liang ka KSU, North Khasi Hills District Unit, ha ka jingïalam u Samla Lambok Rymbai kum u Vice president lem bad ki dkhot ki la kynduh ïa kine ki ar ngut ki nongïakhun kti ba paw bad kum ka jingai mynsiem ki la pynbud ruh da ka song pisa kaba long shi bynta ban kyrshan lem ïa ki ha ka jingleit shim bynta ha katei ka jingïakhun kti jong ka pyrthei.
U Samla Lambok Rymbai u la ai ruh ka jingkitbok kitrwiang ba kine ki ar ngut kiba la leit ban shim bynta sha katei ka lympung kin leh bha bad ba kin wan rah burom ïa ka Ri Bhoi District bad ka jylla hi baroh kawei da kaba ioh khur ïa ka nam jop na katei ka lympung.
Na ka liang ka Kong Margret Pathaw ruh ka la ai khublei ïa ka KSU, North Khasi Hill District Unit bad baroh ki seng bhalang bad ki paidbah kiba la kyrshan ïa ki halor kane ka jingleit shim bynta sha Turkey bad kyrpad ba kin buh lem ha ki jingduwai khnang ba kin lah ban ioh khur ïa ka nam jop ha katei ka lympung.
