Roing, Risaw 13 : Haduh kumba 31 ngut ki nongtrei bylla jong ka kompeni PGCIL kiba la sahkut hapoh ka dewlynnong jong ka wah Dibang ha Bomjir naduh ka 10 tarik mynta u bnai namar ka jingkiew jong ka um la lah ban pyllait im ha kane ka sngi ba Ar ba la lah.
Ia kane ka kam pyllait im la shim bynta da ki dkhot na ka tnat 12th BN NDRF ha ryngkat ka jingkyrshan lang ki bor pulit ka Roing bad ki dkhot na ka tnat fire service lem bad ki nongtong dohkha ka thain.
Kane ka kynhun kala wan poi ha katei ka jaka ba la jia ha ka por 8.15 mynstep, bad ka jingsdang ia ka kam kala sdang naduh ka por 8:30 mynstep ha kaba kila lah ban pyllait im ia baroh kitei ki nongbylla na katei ka jaka ha ka por 4:15 jan miet.
Na ka liang ka ophis jong ka District Disaster Management kala ai ka jingkhublei kaba kyrpang ia ki nongtong dohkha kiba la iarap lem ha kaba iadei bad kane ka bynta.
