Shillong Risaw 02: Ki dkhot jong ka Sutnga Parish ha ka Sngi Balang kila leit iakynduh ia u Symbud Myntri Rangbah ka Jylla u Bah Sniawbhalang Dhar ban ai jingkyrshan pura ia u kyrtong jongka seng National People’s Party u Dr DRL Nonglait na ka bynta ka elekshon shiteng samoi jongka MP Lok Sabha na Shillong Seat.
Ka jingialang kala iatai sani halor ki mat kiba kongsan kiba iadei bad ka bha ka miat bad ka roi ka par jong ka thaiñ Sutnga.
Ki dkhot jong ka Parish kila pynpaw ia ka jingsngewhun bad kila pynbna ruh ba kin ai jingkyrshan ia u Dr Nonglait.
“Ngin ai ka jingkyrshan kaba pura ia u Dr DRL Nonglait. Ngi ngeit skhem ba un shakri bad mihkhmat ia ka jylla bad ia ki paitbah ha ka rukom kaba bha tam”, la ong ki dkhot jongka Parish.
Katei ka kynhun kala ong ruh, ba ka jingialang, kala pyni ia ka jingiatylli bad kala don ruh ka jingiasngewthuh jingmut hapdeng ki nongialam shnong bad ki paitbah hashwa ban wan ka elekshon.
