Dibrugarh, Risaw 01: Ki bor pahara, ki la pynpulom noh ia ka jingthmu ban hiarthma kaba heh ha Changlang district jong ka Arunachal Pradesh, ha kaba ki la kem ia arngut ki briew kiba la suba ba ki dei ki dkhot jong ka United Liberation Front of Asom–Independent (ULFA-I) bad ki la ioh kurup ia kawei ka suloi AK-series, uwei u bom improvised explosive device (IED) bad kiwei de ki tiar bad ki kuli.
Katkum ki khubor, la kynnoh ba ka kynhun ba iatreilang kaba don kumba 20 ngut eiei ki lehnoh kiba dei jong ka ULFA-I bad ka kynhun NSCN (K-YA) ki la thmu ban leit ambush ia ki bor pahara ha katei ka District.
Kine ki lehnoh ULFA-I kiba la shah kem ki dei kiba la tip kyrteng kum u Sahadev Rai uba khot sin kum u Bappi Asom bad u Siraj Asom uba la khot sin kum u Siraju Alam.
Hadien ka jingkem bad jinglap ia ki tiar ialeh, ki shipai Assam Rifles ryngkat ka jingiatreilang bad kiwei pat ki tnad pahara ki la pynlong ia ka jingkhynra kaba jur ha katei ka thain ban lap ia kiwei pat kiba la suba ba ki dei ki lehnoh bad ban khanglad ia kino kino ki jingma kiba lah ban wanrah ia ka jingma ia ka jingpahara.
