Shillong Risaw 01: U President ka NPP-Meghalaya bad Symbud Myntri Rangbah ka Jylla Bah Prestone Tynsong, ula kynthoh tyngeh ia kiba kynnoh ba ka jingbun ki paidbah ha ka jingialang ialap elekshon ka NPP ka dei namar ba shu thied khlieh briew bad ong ba kane baroh ka dei namar ka jingtrei shitom bad jingshimkhia jong ki nongkitkam ka NPP.
“Nga sngew kum kita ki khun riewspah, ba lah hana ban leit thied ia ka khlieh briew, sngew kumba leit sha iew Shella ban leit thied ia ka khlieh dohkha. Nga kwah ban jubab hangne, na ka bynta kito ki lok kiba kynnoh ia ngi kumta” ong u Bah Prestone na ka rynsan ialap elekshon ia u kyrtong ka NPP Dr DRL Nonglait sha ka elekshon shiteng samoi ka Shillong Lok Sabha kaba long ha Pynshadkhurai, Saitsohpen hynne ka sngi Balang.
Kat kum ka jingong jong u, “U National President bad Myntri Rangbah ka Jylla Conrad K Sangma bad ma u kum u President ka Jylla, ula bthah ia ki Block Committee ka party ba kim dei ban thiah ban dem, ki dei ban leit rung sh man ki iing ki sem bad ban peit lem ia ki jingdonkam ki shnong ki thaw khamtam ki longiing kiba duk ba jynjar bad kiba donkam ia ka jingiarap namar ka NPP hi ka dei kaba la seng ha ka nongrim ban shakri ia u paidbah”.
Haba pynshai ia ka jingmut ban shakri ia u paidbah, u Bah Prestone ula ong “Lada phi ieid ia ki paidbah, phi ieid ia ka Jaidbynriew bad phi ieid ia ki longiing longsem, bad sdang ia ki jingshakri na ki shnong ki thaw”.
Haba kynthoh ia kiba kynnoh shu thied khlieh briew, u Bah Prestone ula ong ba ka daw ba ki kynnoh ka long namar ba kim lah ban pynshit bad ban pynrhem ia ka jingmut jong ki paidbah ha ki constituency bapher bapher.
“Balei kim lah, ka daw tynrai ka long ba kim ai um, um don umjer, umdon sboh. Haba phi thung jhur ha phyllaw iing lajong, lada phim ai um kam don jingmut, u tyrso tang shi sla ruh un ym ioh ban kheit, kata kadei ka jingshisha. Hynrei haba ngi thung jingthung la ha bri ne ha iing, ngi hap ban sumar ia kita bad haba ngi sumar ka mut ngin ioh ban kheit ia u soh uba biang” ula ong.
“Hynrei ki lok ki bym leh kumta, haba ki iohi pynban ia kiwei pat ba ki bunkam ban ai um ban ai sboh, ki ialade bym lah, ki shu kynnoh beiñ bapli ia ka NPP” ula bynrap.
Nalor kane ula ong, “Lehnoh ei ki syntiew, ki jhur ki jhep lada phim ai jingsumar, ka party NPP haba ngi thung, ngin sumar bad ruh ngin pynseisoh”.
Ula kyntu ruh ia ki paitbah ba kin mih na kane ka jingialang da ka mynsiem kaba shitrhem bad ban duhthiah duh dem ban ioh ia ka jingjop.
Ka NPP kala pdiang sngewbha ruh ia ki nongialam na ka seng UDP bad ia ki paitbah ka Shella Constituency kiba la wan ban pyniasoh noh ialade sha ka seng NPP ha kane ka jingialang.
Kiba la iadonlang ki kynthup ia u kyrtong MP ka NPP DR DRL Nonglait, ki MLA kiba kynthup ia ka Kong Ampareen Lyngdoh, u Subir Marak, u Bah Gavin Mylliem, ka MDC ka Shella ka Kong Grace Mary Kharpuri, ki nongialam ka NPP ryngkat bad da ki hajar ngut ki paitbah.
