Shillong, Nailur 30 : Ka Deputy Commissioner ka West Khasi Hills Hema Nayak, kala thung ia ka Inquity Committee, ka ban tohkit ia ka jingkynnoh ka Voice of the People Party (VPP) Youth Wing ba ka don ka jingbamsap/bam pisa ha ka jingthungkam Nurse hapoh ka MCH Hospital, Nongstoin.
Ha ka kyrwoh, ka DC ka pyntip ba ka Ophis kala shimkhia bha ia ki jingkynnoh kiba iadei bad ka jingpyniaid ia ka jingthungkam Nurse hapoh ka MCH Hospital.
Haba jubab ia ka dorkhas bala aiti da ka VPP State Youth Wing, ka DC kala pynpaw ba ka jingleh hok, ka jingtreikam ba shai bad ka jingjied kat kum ka jinglah ha ka kam thungkam ki long kiba kongsan bha ia ka bor district, bad ia kano kano ka kam bamsap lane jingdawa beain yn leh da kaba tyngeh kat kum ka ain”.
Ka pyntip ba kala thung ia ka Inquiry Committee ba kynthup ia u Superintendent of Police ka WKH Bah H Kharkongor, MPS, bad u Bah E Lyngdoh, MCS, AC & Executive Magistrate ka WKH, Nongstoin.
Ka pyntip ruh ba kan nym don ka jingpynmih ia ka result lane ka thup ki kyrtong ba shah jied tad haduh ban da pyndep ia ka jingtohkit bad dep pynbeit bha jai ia kane ka kam.
Kala kyntu ia ki kyrtong bad ki paidbah ba kim dei ban ngop ha ki briew ba pynbiej aikam, lane ki briew kiba kam ba lah ban leh eiei ha ka jingthungkam, bad ban pyntip ia kum kine ki kam beain sah ki bor district lane ka inquiry committee.
Ka bor district ka iai ban ba kan sa leh eiei kat kum ki kyndon ka ain hadien ba dep bad aiti ia ka kaiphod jingtohkit.
