Imphal, Risaw 13 :U Myntri Rangbah (CM) ka Manipur u N Biren Singh ula pynlong ka jingkhot halor ka jingdonkam ban pynneh pynsah ia ki khlaw ki btap.
Ia kane u CM ula pynpaw ha ka jingkren ha ka jingialang plie ia ka ‘Van Dhan Vikas Kendra Mela 2022’ hapoh Manipur State Film Development Society ha Imphal hynnin ka sngi Balang.
Na ka liang u Biren Singh ha ka jingkren ula ai ruh ka jingiaroh ia ki heh ka tnat forest halor ka jingtrei borbah ka jong ki na ka bynta ban pynneh pynsah ia ki khlaw ki btap ha ka jylla.Nalor kata ula ong ruh ba ka jingpynkhie im pat ia ki jaka khlaw kiba la sdang duh ha Manipur kala iaid shakhmat.
U CM ula ong ruh ba ka sorkar Manipur kam shym la long pyrshah ia kano kano ka kynhun nongshong shnong ha ka jylla.
Ula ong ruh ba ka sorkar jylla kala shim ia baroh ki sienjam na ka bynta ban pynneh pynsah ia ki jaka khlaw na ka bynta ki pateng ki ban wan.
Ia ka ‘Van Dhan Yojana’ la sdang ha Manipur ha ka 14 tarik u Risaw 2019 da ka jingthmu ban pynbha bad ban kyntiew ia ka ioh ka kot bad ka roi ka par hapdeng ki trai shnong riewlum ka jylla.
Lyngba kane ka skhim u CM ka Manipur ula ong ba mynta la lah ban ai kam ai jam sha kumba 41,918 ngut ki dkhot jong ki kynhun self-help groups (SHGs) bapher bapher ha ka jylla.
U CM Biren Singh u pyntip ruh ba ka sorkar jylla kan pyrshang ban pyndep noh shen ha kaba iadei bad ka jingshna ia ki sem bad ki jaka buh na ka bynta ki mar khlaw ryngkat ka jingiamir jingmut lang bad ki tnat bad dei khmih kumjuh bad ki heh sorkar.
Nalor kata ula ong ruh ba ka jylla ka dang don shibun ki lad ki kabu bad ki jingdon jingem ia kiba kan dang plie ha ki sngi ki snem ki ban dang wan.
“Lada ngi lah ban bynrap shuh shuh ha ki mar ki mata, kata kum ha kaba song bha ia ki mar khlaw na ka bynta ban pyniaid iew ia ki, kumta ruh ki mar ki jong ngi kin lah ruh ban ia aireng wat ha ki jaka iew jong ki ri ka pyrthei,” ong shuh shuh u CM ka Manipur.
Shuh shuh ula ban jur ruh halor ka jingdonkam ban buh ia ki karkhana pynmih mar bam ha ki jaka kiba biang hapoh ka nongbah Imphal.
