Shillong, Nailur 30: U Chief Electoral Officer (CEO) ka Jylla BDR Tiwari u la iathuh ba 90.65 percent ki jingbishar hapoh ka Special Intensive Revision (SIR) 2026 la lah ban pyndep bad la bthah ruh ia ki ophisar ba kin pynthikna ha kaban pyndep noh ha ka por kaba biang ia kiba dang sah.
U CEO u la pynlong ia ka jingialang bishar bniah lyngba ka (virtual review meeting) bad ki Deputy Commissioner, ki District Election Officer, ki ERO, ki AEROs bad kiwei kiwei ki ophisar ka tnat ilekshon nalor ka jingialang bad ki seng sain pyrthei ha kaba naki 21,69,243 ngut ki nongthep vote ba don haka Draft Electoral Roll, la pynmih ia ki Notice (jingpynbna) na ka bynta 6,6510 ngut bad 6,51,066 kila pynpoi iaki kot ki sla ba donkam bad kaba sah kadei tang 619 ngut.
U la pyntip ba haduh mynta la pyndep haduh 5,90,784 tylli ki jingbishar, bad 910 ngut kila shah khein ba kim donhok ban shah kynthup haka thup Thep Vote lane Final Electoral Roll katba 19,07,182 ngut ki nongthep vote na ka Draft Roll kin sa shah kynthup noh haka Final Electoral Roll.
Haba kdew ïa ki jingbthah ba thymmai jong ka Election Commission of India ba la pynmih ha ka 26 tarik u Nailur, u Tiwari u la ong ba ha ki khep ba la pynmih ïa ki jingpynbna halor ka No Mapping lane ka jingbym beit ka jingbishar bniah, ki BLO ba dei peit mynta kin leit sha ki ïing jong ki paidbah ban leit lum ïa ki kot ki sla ba donkam bad ban thep ïa ki ha ka ECINET hadien ba bishar bniah daki ERO bad ki paidbah kim donkam ban leit shaki office jong ERO ne AERO
U la ong sa stang ha ki khep kiba donkam eh ba ki paidbah ki hap ban leit lane donkam ban bishar bniah daki ERO ha kaba ia kane lah ruh ban leh online, lane uno uno u nongthep Vote u lah ruh ban ai bor ia uno uno u dkhot jong ka iing ka sem ban wan sha ka jingbishar na ka bynta jong u.
U CEO u la ong ba la pynmih ïa ki jingbthah ban pynkhlain bad pynsuk iaka rukom bishar bniah khamtam ïa ki riew tymmen, ki briew kiba don jingduna ha ki dkhot met bad kito kiba ïakynduh jingeh ban leit sha ki ophis, katba la bthah ruh ïa ki DEO ban pyntreikam iaki Helpdesk lane Special Camp na ka bynta ki briew kiba ym don iing, kiba sah ha ki jaka sah miet, ki nongtrei kiba duna dkhot met bad kito shah kyntait naka thup thep Vote.
U Tiwari u la pyntip ruh ba la ioh pdiang bad pynkylla digital haduh 23,259 tylli ki aplikeshon, kynthup ïa 12,624 tylli ki phorm 6, 1,616 tylli ki phorm 7, 1,590 tylli ki phorm 8 ban pynkylla bad 7,429 tylli ki phorm 8 ban pynbeit, bad la bthah ïa ki heh Sorkar ban pynthikna ïa ka jingpeit bniah ha ka por kaba biang.
U la pynshai ba na ki 6,51,735 tylli ki Notice, 2,22,786 ki dei kiba iadei bad ka No Mapping bad 4,28,949 ki iadei bad ka jingbym iahap ha ka map, bad ula ban jur ba ka No Mapping, ka jingbym iahap ha ka map kam khein ban shah kyntait naka thup kyrteng thep Vote.
Halor ka jingiashim bynta jong ki sengsain pyrthei, u CE ula ong ba ki don 1,814 ngut ki Booth Level Agents kata 736 ngut na ka NPP, 393 ngut na ka BJP, 320 ngut na ka VPP, 186 ngut na ka INC, 121 ngut na ka UDP bad 58 ngut na ka AITC.
Haba pynkynmaw biang ba ki briew kiba dei hok kiba ki kyrteng jong ki ki shah kyntait ha ka por leh iaka SIR bad ki nongthep vote ba nyngkong ki lah ban aplai ban shah shah kynthup haka thup kyrteng thep Vote, u Tiwari u la kyntu ïa uwei pa uwei u nongthep vote ban peit bad pynskhem ïa ka kyrteng ha ka Final Electoral Roll hadien ba la pynmih, da kaba pynpaw ba ka jingdon ïa ka EPIC marwei kam dei eh ka hok ïa u briew ban ioh thep vote.
