Shillong, Nailur 30 : U Symbud Myntri Rangbah ba khmih ia ka kam Pohiing (Police) Bah Prestone Tynsong ula maham ba ka ain kan shim la ka jong ka lynti pyrshah ia u MDC ka VPP na Nongstoin, uba la rung jubor bad pynthut ia ka interview thungkam nurse ka MCH Hospital, Nongstoin.
U Bah Prestone ula ong ba kano kano ka jingkynnoh kam ai bor iano iano ban leit pynthut ia ka interview ba dang iaid.
“Haba phi sei ia ki jingkynnoh, sngewbha wat pynthut ia kano kano ka interview. Ai ba ka interview kan iaid beit. Shah ia ki kyrtong kiba la shah khot, namar da kaba leh kumne phim ioh eiei hi ruh” ula ong.
Ula ong ba ka Sorkar kala sdang ban wad ne pynshisha ia ki jingkynnoh kiba mih ha ki social media.
“Naba ki jingkynnoh kila mih, ka jingpynshisha bad ka jingtohkit kala iaid. Ngin sa pynshisha bad tohkit ia ka. Ngi donkam ban tip ia ka jingshisha. Hadien ba dep leh kane, ngin sa shim ia ka lynti jong ka ain” ong u Bah Prestone.
Haba iai ban ia ka nongrim jong ka Sorkar halor ka thungkam thungkam, ula ong “Naduh ka sngi ba nyngkong ngi long kiba pyrshah jur ia ka jingleh thok ha ka kam thungkam”.
Haba kylli la kan don ka jingpynshitom ia u MDC, u Bah Prestone ula ong “La ki dei ki MLA, MDC ne MP, katba phi dang dei u nongshongshnong ka Jylla lane ka India, phi hap iaid kat kum ka ain. Kumta ka ain kan shim la ka jong ka lynti”.
