Shillong, Nailur 30 : Ka Sorkar Jylla kala iengskhem ba ki Facilitation Centre ki dei ban don ia ki Food Court ban pynthikna ia ka jaka kaba biang ia ki kali ba kin pynieng bad ba ki nongleit nongwan kin ioh bam jingbam, ong u Symbud Myntri Rangbah ba khmih ia ka kam Pohiing (Police) Bah Prestone Tynsong.
“Ka nongrim jong ngi ka long kaba shai. Ki Facilitation Centre ka hap ban don bad dei ruh ban donlang ka Food Court. Baroh ar ki dei ban iadonlang khnang ba kin don ki jaka kiba biang ba ki kali kin pynieng bad ba ki briew kin ioh ban jingbam, dih sha bad kiwei kiei” ong u Bah Prestone.
Ula ong ba la bthah ia ki bor district ban pynthikna ba ki jingjurip kin long kiba hun.
“Ngi la bthah ia ki bor district bad lada ki don kano kano ka jingartatien lane jingbym hun halor ka jing jurip ba nyngkong, ngi lah ban leit jurip biang sa 2-3-4 sien, ngim don jingeh ia kata. Lada ki jingsngewkhia ki long bad kiwei ki Tnad, ia kata ruh lah ban leh. Ngi ieh ha ka jingstad jong ki bor district ban pynthikna ba ki jingjurip kin long kiba hun” ula ong.
Halor ki jingkawang petrol bomb dang shen bad ka jingsniew ka suk ka sain, u Bah Tynsong ula ong “Nga tharai ka jingkylli kam don jingmut shuh. Ngan ym jubab ia kata. Ha ka jingshisha ngi la leh lut ia kat kiba dei ban leh, kumta ngan nym ong eiei shuh”.
