Shillong, Nailur 30 : Ka Deputy Commissioner ka West Khasi Hills Hema Nayak ka pyntip ba ki bor District kin sa shim da ka lynti jong ka ain pyrshah ia u MDC ka Nongstoin namar ka jingrung jubor bad pynthut ia ka inrerview thungkam nurse na ka bynta ka MCH Hospital, Nongstoin.
Haba pynrem ia ka jingjia, ka DC ka ong ba ki bor district ki dang bishar ia kane ka kam bad kan sa leh eiei kat kum ki kyndon ain kiba iahap.
“Ka bor district ka pynrem ia kane ka jingrung khlem jingbit bad jingpynthut ia ka interview thungkam….Ka bor district kala shong bishar ia ka jingjia bad kan shim ia ki lynti ban leh eiei kat kum ka ain” ong ka DC ha ka kyrwoh ba pynlait ha ka sngi Balang.
Ka DC ka iathuh ba ha ka 29 tarik Nailur, katba ka interview ka dang iaid hapoh ka Conference Room jong ka Ophis ka Deputy Commissioner, u MDC ka Nongstoin uba dei jong ka VPP, ula wan rung hapoh ka kamra shim interview khlem ka jingpyntip lane ioh jingbit.
“U MDC ula wan rung hapoh ka kamra shim interview khlem da pyntip lane jingbit bad ula kynhied ia ki dkhot jong ka kynhun shim interview ha ka jingdonlang ki kyrtong. Ula pynthut ia ka interview” ong ka kyrwoh.
Ia une u MDC la ialam noh sha ka kamra treikam ka Deputy Commissioner ha kaba ula pynmih ia ki jingkynnoh halor kane ka jingthungkam, ia kaba don katto katne la pynmih ruh ha ki katto katne ki lad pathai khubor.
Ka bor district ka pyntip ba ia kane ka interview thungkam la pyniaid kat kum ki kyndon bala buh. Ia ka written exam la pynlong ha Nongstoin College ha ka 21 tarik Nailur bad 60 ngut ki kyrtong kila shah jied sha ka personal interview ha ka 29 bad 30 tarik Nailur shuwa ban thung ia ka kynhun shim interview.
Haba pynpaw ba ym don mano mano ruh kiba lah ban tuklar ia ki kam thungkam, ka DC kala ong “Ym don mano mano ruh, kam pher ki bat kyrdan aiu, kiba lah ban rung ha ki kamra interview thung kam khlem da ioh jingbit lane pyntut ia ki nongpyniaid interview ba kin pyndep iala ka kam. Kum kane ka jingleh ka ktah ia ki kyrtong kiba la pynkhreh da ka jingshaniah ban leh hok”.
Ka bor district kala kren shai ruh ba kano kano ka jingsngewkhia halor ka thungkam thungkam dei ban aiti da ka jingthoh bad ki jingtip kiba bniah ha ryngkat ki sakhi ban kyrshan ia ki jingkynnoh sha ki bor kiba dei khmih.
“Kino kino ki briew kiba don jingtip halor ka jingdawa pisa lane leh bym hok ha kane ka jingthungkam ki dei ban aiti ia ki sakhi sha ka Deputy Commissioner, West Khasi Hills. Ia man ki jingujor yn sa shong bishar bad sa leh eiei kat kum ka ain pyrshah ia ki briew kiba donkti” ong ka DC.
