Nongpoh, Nailur 30: Ki pulit jong ka Byrnihat Police Station ki la kem ïa uwei u samla 22 snem ha ka shnong 20 Mer, Byrnihat, halor ka jingsuba don u bynta ha ki kam khaii drok. Ki pulit ki la ioh bat ia utei u samla ryngkat bad ka scooty kaba don ïa u registration number ML 05 AH 7007.
Katkum ka jingtip, utei u samla u la wan na ka thaiñ Guwahati da ka jingthmu ban thied drok bad ban leit die pat sha Shillong. Ha ka jingtalasi, ki pulit ki la ioh kurup na u ïa u drok uba don ka jingkhia 9.77 gram, uba la song bha hapoh ka synduk sabon.
Hadien ka jingtest, ki pulit ki la pynshisha ba u drok uba la kurup u dei heroin.
Ha ka jingtohkit, utei u samla u la ïathuh ba u la leit thied ïa utei u drok na thaiñ Guwahati da ka jingthmu ban die sha Shillong. U la ïathuh ruh ba la don lai ngut ki paralok kiba la pynlum lang ïa ka pisa kaba kot ₹90,000 tyngka ban thied ïa utei u drok.
Naka liang ki pulit, la register case pyrshah ïa utei u samla katkum ki kyndon jong ka aiñ. Ka jingtohkit ka dang ïaid shakhmat ban lap ïa kiwei pat kiba don bynta ha kane ka kam.
Ki pulit ki la rah ruh ïa ka scooty kaba la pyndonkam da utei u samla ha kapor ba u leit thied Drug.
