Shillong, Nailur 30: U Symbud Myntri Rangbah ka Jylla uba khmih ia ka Kam Pohiing u Bah Prestone Tynsong ha ka sngi Baar, ula ong ka jingtyrwa ban pynkylla ne Amendment ia ka Foreign Contribution (Regulation) Act kam dei da ka jingthmu ban long pyrshah thik tang ia ki kynhun Khristan hynrei kadei ia baroh ki kynhun kiba ioh pdiang ia ka jingiarap pisa nabar ri, hynrei kane ka jingpynkhreh ia katei ka jingpynkylla kadei kaba donkam ban bishar bniah shwa.
Haba kren halor ki jingkylli kiba iadei bad ka FCRA, u Bah Prestone Tynsong ula ong, “Ngam tip eiei shaphang katei ka jingpynsngew, ngam don eiei ban ong. Hynrei lada phi kren shaphang ka FCRA Amendment Bill, kam dei kaba long pyrshah thik tang ia ki kynhun Khristan. Ha ka jingshisha, kane kadei ia kino kino ki kynhun kiba ioh pdiang ia ka jingiarap pisa ne ki jingnoh synniang nabar, kumta ki hap hapoh ha katei ka jingpynkylla”.
Ula ong, ba ka jingpulom ban bud ryntih ia ki kyndon kiba la tyrwa ki lah ban lam sha ka jingshah pynduh noh (Cancellation) ka Registration.
“Haba ngi iakren shaphang kitei ki jingpynkylla, lada jia ba ki pulom ha kaban pynthymmai, lada ki pulom ha kaban bud ryntih ia ki jingpyrkhing, ki lah ban shah pynshitom ha ka dur jong ka jingshah pynduh noh ia ka Registration” ula ong.
“Dei halor kane, kaba la sngewkhia da baroh ki kynhun ne ki NGO kiba la Register hapoh jong katei ka aiñ, kynthup ia ki kynhun Khristan, kane ka jinglong jingman kumba long mynta jong katei ka jingpynkylla ka donkam ban khmih bniah biang” ula bynrap.
U Bah Tynsong ula pdiang ia jingshim rai ban phah shwa ia katei ka Bill sha ka Joint Parliamentary Committee bad ka jingkynthup lang ia u MP Rajya Sabha ba marwei ka Meghalaya bad na ka thaiñ shatei lammihngi.
“Ainguh ia u Blei, ba ka Parliament kala rai ban phah shwa sha ka Joint Parliamentary Committee. Kumba phi baroh phi ia tip, u Lamphang da ka jingkyrpad u Myntri Rangbah jong ngi u Conrad K Sangma, ula pdiang bad mynta u James Sangma udei u MP ba marwei na ka thaiñ shatei lammihngi uba la shah jied kum u ‘Special Invitee’ sha katei ka Committee, kane kadei ka dak kaba bha khamtam eh na ka bynta ki kynhun Khristan bad ia ki jylla ka thaiñ shatei lammihngi” ula ong.
