Shillong, Risaw 13 : U Myntri ka tnad Taxation James K Sangma hynne ka step sngi palei, ula rai ban phah pynduh pyndam noh ia ka Meghalaya Regulation of Gaming Act, 2021 namar ka jingjur palat ka jingpyrshah na ki kynhun bapher bapher.
“Ka la long shai ha nga ba kan bha ban pynduh pyndam noh shisyndon ia ka Gaming Act na ka bynta ka bit ka biang jong ka Jylla, namar ka lah ban pynmih ia shibun ki kynrum kynram. Namar kata, kan dei ka kam ba bha eh ia nga ban peit ba ka Meghalaya Regulation of Gaming Act, 2021 kan duh kan dam noh” ong u James ha ka jingthoh ba ula buh ha ka rynsan Social Media.
U James ula ong ba ha u snem 2021, ka jingthmu ba hakhmat eh ban wanrah ia ka Gaming Act, 2021 ka long ban kyntiew ia ka kam jngohkai pyrthei, ban kyntiew ia ka jingioh khajna bad ka jingaikam aijam ia ki nongshongshnong ka Jylla. Bad, ka jingwanrah ia ki Casino ka long eh tang na ka bynta ki nongshangkai pyrthei.
“Ki don shibun ki jingsngewkhia na ki kynhun bapher bapher ba iadei bad ka jingtreikam bad jingktah jong kane ka Ain” ula ong.
“U Myntri ula pyrshang ban sngewthuh ia ki jingsngewkhia jong ki riew paidbah haba iakynduh la bun sien lyngba ki jingialang bad ki kynhun bapher bapher ba kynthup ia ki seng Niam, ki Sengbhalang, ki Dorbar Shnong, ki District Council bad kiwe kiwei” ula bynrap.
Lah ban kdew hangne, ka Sorkar Jylla dang shen kala ai ia ki Provissional Licence sha ki lai ngut ki briew ban plie ia ki casino na ka bynta ban kyntiew ia ka kam jngohkai bad ka khajna.
Ki Seng Niam bad ki Kynhun bapher bapher kila pyrshah ia kane ka sienjam da kaba ong ba ka jingpynlong ain ia ka kam khalai kan ktah jur ia ka imlang sahlang.
Namar kane ka jingpyrshah jong ki Seng Niam bad Sengbhalang, ka Sorkar Jylla kala rai ban pynsangeh noh ia ka jingthmu ban wanrah ia ki casino hapoh ka Jylla.
