Shillong, Risaw 13: U nongialam ka NPP bad Myntri Sorkar James K Sangma ula ban jur ba u Nongaiktien ka All india Trinamool Congress (AITC) Saket Gokhale u dei ban leh “Homework” bha shuwa ban kynnoh eiei halor ka project Smart meter.
“U Nongaiktien jong ka seng sain pyrthei u don ia ka hok ban kynthoh hynrei ngi dei pat ban don ia ka jingkitkhkieh na ka bynta ki paidbah ym ban shu hylla man ka por hynrei ban leh Homework bad tip ia kaei kaba dei ban kren ia kiei kiei kiba long ki jingtip hakhmat u paidbah… Kane ka dei kaei kaei kaba u briew ba don ka jingkitkhkieh un leh bad nga kyrpad biang ia u (Gokhale) ban da pyrkhat bha”ong u James haba iakren bad ki nongthoh khubor.
Kane kala mih shisngi hadien ba u Gokhale ula phah ia ka shithi ba kyrpad ia u Myntri ban batai ba kumno u don u Inhemeter Smart Meter na China ba pyndait ha ka iingsah jong u myn ha u bnai Rymphang 2021 haba u Symbud Myntri Rangbah ula kam ha u Naitung 2022 ba kine ki meter ki dei ki bym pat mynjur da ka REC/Govt of India?
U James ula ong ba u Gokhale um pat tip ba ka la don ka kynhun tohkit bala khlieh da u Justice bala shongthait ka High Court, bala thung da ka Sorkar bad ba ka la dep ruh ban aiti ia ka kaiphod halor kane.
“Ka kaiphod ka lah ong ba kam shym don eiei kaba bakla ha ka project smart meter. Namar kata, nga sngew ba u Gokhale u khlem leh homework bha haba phai shane ki kam. U dei ban pule bha ia kiei kiba don ha kine ki kam, kiei ki kam ba lah leh bad uei u soh jong kine ki kam bala leh da ka sorkar” ula bynrap.
Halor ka jingkynnoh ba thaw hi ia ki kot ki sla ban pynshisha, u James ula ong, “Ka long kaba suk ban shu kynnoh iano iano. Nga mut ia u Gokhale ban shu kren ia kine kiei kiei ka dei ban long kat kum ki jingshisha bad lada u don ia kine kk ningshisha ba un sngewbha ban wan shakhmat bad ngin jubab ia ki lada dei kiba don nongrim shisha hynrei lada kim don nongrim ka tharai ka dei tang ka jingpynsyrwa kai ia ka por”.
Ha kajuh ka por, une u Nongialam ka NPP ula ban jur ba ka party ruh ka tip iala ka kamram ha ban jubab ia ki jingkynnoh u Gokhale ba kam shym lah aiti ia ki jingkhein ba pynlut elekshon sha ka Election Commission of India (ECI) .
“Nga lah dep pynpaw bad kwah ban biang hangne ba kum ka party ngi tip iala ka kamram, ngi don ia ki nongialam kiba la rangbah kiba ialam ia ka party. Kine ki nongialam bad ki nongtrei ka party ki tip ia kaei ka kamram jong ki, kiei kiba donkam ban hap leh ym tang sha ka ECI hynrei kiwei kiwei ki Agency”.
