SHILLONG, Risaw 12: U myntri ka tnat ka koit ka khiah u James P.K Sangma ula ong ba ba ka sorkar ka dang wad ia ki lad ki lynti kumno ban weng ia ki jingeh naka jingduna doktor specialist ha Jylla
Haba kren sha ki lad pathai khubor u James ula ong ba ka long kaba donkam ia ka sorkar ban shim ia ki sienjam ha kaban pynthikna baka kam ai jingsumar ia ki nongpang kan ym shah ktah na ka jingduna jong ki doktor specialist.
Haba pynpaw ba ka sorkar kam riej ban kubur ia ka jingshisha, u Myntri ula pyntip ba ka Sorkar ka dang wad ia ki lad ki lynti kumno ban wanrah ia ki doktor bala thung kat kum ka kyndon 3F bad ruh ban wanrah ia kiwei kiwei ki doktor ki ban lah ban ai ka jingshakri.
“Kine ki dei ki kam kiba ngim artatien ban ong ba ngi don ka jingduna bad ka kam ba hakhmat eh ka long ban ithuh ia kine ki jingduna bad ban leh eiei bad khmih ruh kumno ngin weng ia ki jingeh” ula ong.
Haba kylli halor ka jingslem ka jingthungkam da ka Meghalaya Public Service Commission (MPSC), u James ula pynpaw ba um kwah satia ban kynthoh eiei ia ka MPSC namar ka dei ka tnad kaba treikam laitluid.
“Nga tharai ia kum kine ki jingkylli dei ban kylli na ki bad nga sngewthuh ba ka jubab ruh ka dei ban wan na ki namar ngam kwah ban jubab na ka bynta ka MPSC” ula ong haba bynrap “Hynrei ngi dang pyrshang ban iakren bad ka MPSC ban leh katba lah bad nga thikna b aka Sorkar ka dang pyrshang ban wad ia ki lad ki lynti ba kham janai”.
U Myntri ula kular ruh ba ka Sorkar kala pyrshang katba lah ban wad ia ka lynti ha kaban pynthikna ba ki doktor ba iateh da ka bond kin wan phai pat sha ka Jylla.
