Shillong, Risaw 12 : U Deputy Superintendent of Police (DSP) ka Police Reserve Bah Dangsan Khyriem, ula khot hajir hynne ka sngi Balang ia u President ka Meghalaya Government Lower Primary Schools Contractul Association (MGLPSCA) bah Birbor Riangtem ban pan jingshai halor ka jingjia haka 6 tarik mynta u bnai.
“Nga la shah khot hajir ha u Deputy Superintendent of Police ka Police Reserve bad une u heh Pulit ula kylli pyrthew ia kaei kaba jia ha ka 6 tarik Risaw (jingshah kawang bomb pynsatkhmat ki Nonghikai ba iaidkjat Barik sha Secretariat)” ong u Bah Birbor haba iakren bad ki nongthoh khubor.
U bah Birbor ula pyntip ba ma u ryngkat bad kiwei ki para nonghikai kila iathuh ia u DSP ba kala don ka ejahar bala aiti sha u DGP halor ka jingjia ba 6 tarik bad ba une u Heh Pulit u lah ban peit ia kane ka ejahar ha ki rynsan Social Media ban lap ia ka jingshisha.
“Ha ka jingshisha la ïohi shai ha ki rynsan pathai khubor mano kito kiba don kti ban kawang ïa ki bomb pynsat khmat hynrei lah ban ong ba kane ka jingkhot jong u DSP ia ngi, ka long ban dang pynshisha shuh shuh ïa kaei kaba ngi la sakhi hi haka 6 tarik mynta u bnai” ong u bah Birbor.
U bah Birbor ula ong ba lada ki pulit ki pynlong ïa ka jingtohkit kidei ruh ban pynthikna ba kadei ban long kaba seisoh namar bunsien lada peit ïa ki jait jingtohkit bapher bapher ka shu kut tang ha ka jingtohkit.
Ula ong ba ki nonghikai ki don jingkyrmen ba ha ka jingïakynduh bad u Symbud Myntri Rangbah, kan sa don ka jingseisoh watla u Myntri ka tnat pule puthi um lah ban leh eiei na ka bynta ki nonghikai.
