Nongstoiñ, Risaw 12: Kum shibynta ka jingrakhe ba kyrpang ia ka jingdap 75 snem jong ka jinglaitluid jong ka ri India kaba la tip kum Azadi Ka Amrit Mahotsav, ka ophis jong ka District Sport Officer (DSO) West Khasi Hills kan pynlong їa ka jingїamareh thong kaba 8.7 kilomitar la 17 tarik mynta u bnai.
Ha u kyrwoh ba la phah mynta ka sngi da ka kong Balarina Syiem DSO, la ong ba ha ka katei ka jingїamareh thong yn pdiang їa baroh ki shynrang bad kynthei kat kiba kwah ban wan їashim bynta.
Hynrei ki hap ban pynpoi їa ki kyrteng jong ki ha ka ophis jong ka ha lane shuwa ka 14 tarik mynta u bnai ha ka por long trei bad kiba wan ai kyrteng, ki dei ban wanrah lang їa ki original birth certificate na ka bynta ban pynshisha.
Ïa katei ka jingїamareh, yn sdang na phyllaw jong ka ophis u Deputy Commissioner ha ka por 6.45 baje mynstep bad baroh ki ba nongїashimbynta ki ban dei tang na West Khasi Hills, ki dei ban poi ha ophis ka DSO ha ka por 6.00 baje mynstep.
Ki buskit na ka bynta ki nong jop ki don lai tylli ba kynthup їa ki shynrang bad kynthei, kata ba nyngkong Rs 5000 tyngka ba ar Rs 3000 tyngka bad ba lai Rs 2000 tyngka.
