Shillong, Risaw 12: U Myntri ka tnat kam pohïng bah Lahkmen Rymbui ula iathuh ba ka Regional Committee jong ka Jaintia Hills kala dep ban sdang ia ka jingiathir haba iadei bad ka jingiapynbeit pud jong ka wat kaba ar bad ka jylla Assam.
Haba kren sha ki lad pathai khubor u bah Lahkmen ula ong ba haka 6 tarik mynta u bnai ka Regional Committee jong ka West Jaintia Hills District kala shong ka jingialang para dkhot naka bynta ban iathir iaki lynti bad ki sienjam baka komiti kadei ban leh hashuwa ban sdang noh ka jingiakren bad ka sorkar Assam naka bynta ban ia pynbeit pud.
“Ka jingiapynbeit pud bad ka jylla Assam kam long kaba suk bad dei na kane ka daw ba ka Regional Committee jong ka West Jaintia Hills kala shong jingialang para maki ban iaphylliew jingmut kumno ban iaid shakhmat halor kane ka bynta” la ong u bah Lahkmen.
U bah Lahkmen ula ong ba ka sorkar jylla ka don jingsngewkhia haba iadei bad ka jingeh ki paidbah ba sah haki thain khappud bad dei namar kane ba donkam ban thaw iaki komiti bapher bapher naka bynta ban sngap ban bad pan jingmut na ki paidpah hashuwa ban shim iaka rai ba khatduh.
“Kan dei ka kamram jong ki dkhot ka komiti ban lum iaki kot ki sla lane iaki jingpynshisha na ki paidbah haba iadei bad ka jinglong trai iaka khyndew ka shyiap bad kumjuh ruh ban sngap iaka mon u paidbah hashuwa ban iaid shakhmat ban iakren pynbeit pud bad ka jylla Assam” ula ong.
U Myntri ula ong “Ka jingiapynbeit pud kan dei ka kam ka ban shim por hynrei ka Regional Committee jong ka West Jaintia Hills kala sdang ban leh iaka donkam, ban ioh sdang noh ka jingiakren hapdeng ka sorkar Meghalaya bad Assam” .
