Guwahati, Nailur 23: Da ki hajar ngut ki paidbah kiba la shah ktah ha ka jingshlei um na Sivasagar, Charaideo bad Jorhat, ki la pynlong ïa ka jingïakhih ha Chachal ha Guwahati ha ka sngi Balang, ha kaba ki la dawa bai lutksan kaba ₹10 lak na ka bynta ki mar ki mata kiba la shah pynjulor ha ka jingshlei um kaba dang shen.
Ia kane ka jingiakhih la pynlong da ka Raijor Dal bad Krishak Mukti Sangram Samiti (KMSS).La pynlong ruh ia ka jingiaid bad iaid paidbah na Chachal sha Six Mile.
U president ka Raijor Dal uba dei ruh u MLA ka Sivasagar, u Akhil Gogoi, u la kynnoh ba bun ki longïing kiba shah ktah kim pat ïoh ïa ka jingïarap kaba biang watla ka sorkar ka la pynbna ïa ka jingïarap kaba long ₹25,000.
“Ngi la duh ia ki jingdon jingem kiba shongdor haduh ₹50 lak, ₹1 klur ne wat ₹2 klur, hynrei ka sorkar ka kular haduh ₹1.2 lak.Dei na kata ka daw ba ngi la dawa bai lutksan ym duna ia ka ₹10 lak”, la ong u Gogoi.
U nongïalam ka Raijor Dal, u Gyanashri Bora, u la kynnoh ruh ïa ki jingbym ïahap ha ka jingjurip ïa ki jingjulor bad ong ba ka ₹15,000 lane ₹25,000 kam pat biang na ka bynta ki longïing kiba ki ïing ki sem bad ki jingdon jingem jong ki ki shah ktah jur.
U nongïalam jong ka Cockroach Janata Party (CJP) na Delhi u Ankit Bhardwaj u la ïashim bynta ha kane ka jingïakhih bad kyrshan ïa ka jingdawa ban pynbeit ïa ka jingshlei um kaba ju jia man ka por ha Assam.
“Ka jingeh kaba khraw tam ba ka Assam ka ïakynduh man la u snem ka dei ka jingshlei um.Ki samla bad ki paidbah ka Assam ki kwah ïa ka jingpynbeit kaba neh”, la ong u Bhardwaj bad bynrap ba ka CJP ka kyrshan ruh ïa ka jingtohkit halor ki kam tih beaiñ ba la kynnoh.
Ki nongiakhih ki la dawa ia ka jingsiew bai lutksan kaba kham heh, ka jingbishar bniah ia ki jingduhnong bad ka jingai jingiarap kaba biang na ka bynta ki iing ki sem, ki kam bad kiwei kiwei ki mar ki mata kiba la shah pynjulor.
