Guwahati, Nailur 22: Ka Cockroach Janata Party (CJP) ka la pynbna ia ka jingthmu ban pyniar ia ki kam jong ka seng ha kylleng ka thain shatei lammihngi bad ki dkhot jong ka National Working Committee, ki la buh por ban leit jngoh ia ka Guwahati naduh ka 23 tarik haduh ka 28 tarik u Nailur.
Haba kren ha ka jingïalang bad ki nongthoh khubor ha Guwahati, u Core Coordinator ka CJP Assam u Shahil Uddin u la ong ba kane ka nongbah kaba la kheiñ kum ka khyrdop sha ka thaiñ Shatei Lammihngi, kan pynlong ïa ka jingïalang kaba nyngkong eh jong ka party kaba kynthup ïa ki nongtrei mon sngewbha na kylleng ka thaiñ.
Katkum u Uddin, la khmih lynti ba ki nongtrei mon sngewbha na Mizoram, Manipur, Tripura, Meghalaya, Arunachal Pradesh bad Nagaland kin iashim bynta ha ki jingiakren halor ki jingthmu jong ka party bad ki kam ki ban sa leh hadien habud.
“Ka kynhun jong ka Central Committee jong ngi ka dang wan jngoh ia ka Guwahati kum ka khyrdop jong ka dong shatei lammihngi.Ka jingialang kaba nyngkong eh jong ngi ka long ha Guwahati, ha kaba ki volunteer na baroh ki jylla ka thain shatei lammihngi kin wan.Hadien kane, ngin sa shna ia ka lynti iaid jong ka jingthmu ban leit jngoh ia kawei pa kawei ka jylla”, la ong u Uddin.
U la ong ba ka party ka thmu ban pynkhreh ia ka lynti iaid katkum ki jylla bad ban pynlong ia ka jingiakren bad ki coordination committee ha ki jylla shimet shimet shwa ban shim ia ka jingleit jngoh kylleng ka thain.
La khmih lynti ba saw ngut ki dkhot jong ka CJP National Working Committee kin poi ha Guwahati Airport ha ka 23tarik Nailur bad kin sah ha katei ka nongbah haduh ka 28 tarik Nailur.
U Uddin u la ong ruh ba ka party ka dang trei ban pynkhlain ha Assam bad kiwei kiwei ki jylla jong ka thain shatei lammihngi bad u la kam ba ka (legal team) ne ka kynhun ain jong ka kan ai jingiarap khlem jingsiew ia ki briew.
U la ong ba ka CJP ka treikam mynta kum ka seng bhalang, ha kaba ka jingthmu ba la pynpaw jong ka ka long ban wad ia ka jingkitkhlieh kaba kham khraw na kito kiba don ha ka bor.
“Haduh mynta ngi dang trei kum ki seng bhalang.Ka jingthmu jong ngi ka long ban pynbeit ia ka rukom treikam, ka CJP ka pyrkhat ba ki paidbah kiba shong ha ka bor ki dei ban long shwa kiba don ka jingkitkhlieh”, la ong u Uddin.
U Co-Coordinator ka CJP Assam u Hari Jyoti Deka u la kyrpad ia ki briew kiba kwah ban pyniasoh bad kane ka party ba kin wan shakhmat bad u la ong ba ka kynhun ka thmu ban rah ia ki jingeh paidbah ha Assam bad ban pan jingkitkhlieh halor ki kam kiba dang sahteng.
“Lada don kiba kwah ban iasoh, ki long kiba la pdiang sngewbha bha ban leh kumta.Ngi kwah ban pynbeit ia kaei kaba jia bad kaei kaba dang jia, ngi hap ban sngewthuh ia ki paidbah ka Assam bad ban trei na ka bynta jong ki, ngi hap ban sngap shwa ia ki paidbah ka Assam nangta ngin sa jubab ia ki”, la ong u Deka.
Ka CJP ka la ong ba ka jingthmu jong ka ban leit tour sha Northeast kan pynleit jingmut ha ka jingpynheh ia ka seng, ka jingiatreilang bad ki kynhun ha ka kyrdan jong ka jylla bad ki jingiakren halor ki mat kiba ktah ia ki briew ha kylleng ka thain.
