Shillong, Risaw 12: U bah Hubert Paliar watla u don hapdeng ka jingduna ha ka bor kren hynrei udei uwei na ki nongiakhun kti ban ioh mih khmat iaka ri India sha ka Arm Wrestling Championship kaban long ha Turkey naduh ka 14 haduh 18 tarik mynta u bnai.
U samla Hubert Paliar ba na Mawliehbah, ka shnong kaba jngai kumba 15 km na Nongstoin, West Khasi Hills un mih na India ha ka sngi Palei ban mihkhmat ia ka Ri ha ka jingiakhun Arm Wrestling World Championship’ Arm Wrestling World Championship’ ba 55 kg.
Haba kren sha ki lad pathai khubor ka kurim u bah Hubert kong Mariam Thangkhiew kala iathuh ba kane ka jingioh lad ban mihkhmat iaka ri India sha Turkey kadei lyngba ka jingiarap na ki kynhun bapher bapher ba kynthup naduh ki riew paidbah, ki nongialam shnong, ki nong ialam niam, ki seng bapher bapher kynthup u Myntri Rangbah ka jylla u Conrad K Sangma.
Ka kong Mariam kala iathuh ba ki don haduh 11 ngut ki nongiakhun kti napoh ka jylla Meghalaya bad baroh napoh ka ri India ki don haduh 45 ngut bad kine kin mih lang haka 13 tarik mynta u bnai ban leit sha Turkey.
Kala iathuh ba naduh nyngkong u bah Hubert u don jingthrang ban leit shim bynta haki jingiakhun kti ha kylleng ka ri India bad mynta ka kynti lyngba ka jingtrei shitom, ula ioh ka lad ban mih khmat iaka ri India.
“Dang shen ki riew paidbah, ki kynhun bapher bapher bad u Myntri Rangbah ka jylla u Conrad K Sangma ula noh synniang T. 1 lak naka bynta ban iarap pisa ia u bah Hubert ban leit iakhun kti sha Turkey” la ong ka kong Mariam.
Halor kane ka kong Mariam ka la ong ba naka liang u bah Hubert bad ka iing ka sem ka ai khublei ia baroh kiba la synniang bad kiba la kyrshan ia u ban bteng ha kane ka jingiakhun kti ha kylleng ka ri India bad mynta shaduh Turkey.
