Shillong, Nailur 16: Ka North East Zone Inter-State Badminton Championship 2026 ka la wanphai biang sha Meghalaya hadien 10 snem bad la pynlong ia ka ha Jawaharlal Nehru Indoor Stadium Shillong.
Iaka North East Zone Inter-State Badminton Championship 2026 la pynlong da ka Meghalaya State Badminton Association (MSBA) kaba don hapoh jong ka Badminton Association of India (BAI) bad kane ka lympung kan iaid 4 sngi kata naduh 16 haduh ka 19 tarik u Nailur kaba dei ruh ka rynsan ban rung shaka 39th National Games 2027 ka ban long ka Meghalaya.
Ki don palat 250 ngut ki nongïalehkai Badminton na baroh ki 8 tylli ki jylla ka thaiñ Shatei Lammihngi, kata na Assam, Arunachal Pradesh, Meghalaya, Mizoram, Manipur, Nagaland, Tripura bad Sikkim ki ban ïashim ha kane ka lympung.
Haba plie pyrda iaka North East Zone Inter-State Badminton Championship 2026, u Myntri ka tnat Sports and Youth Affairs u Bah Wailadmiki Shylla u la ong ba ka jingwanphai biang jong kane ka lympung sha Shillong ka wan ha ka por kaba biang eh namar ba ka Jylla Meghalaya ka dang pynkhreh ban pdiang ïa ka National Games ha u snem ban wan.
“Ïa ki nongjop la jied na kum kine ki rynsan ba heh” la ong u Bah Wailad da kaba ban jur ïa ka jingdonkam ban ailad ïa ki samla ban ïakhun pyrshah ïa kiwei pat ki samla na kiwei ki jylla.
U Bah Wailad la ong ba ka mang tyngka jong ka Meghalaya haka tnat Sport kala kiew na ka T.40 klur haki 8-9 snem mynshwa sha ka T.844 klur mynta, kaba thmu ban pynbha ia ki jingtei, ban pynbiang ia ki rynsan iakob bad daka ba pynbun iaka khusnam pisa shaki nongjop.
“Mynta ka Jylla ka ai khusnam T.2 lak sha ki nongjop takma ksiar ha ka National Games” u la ong.
Haba kren shaphang ka Meghalaya Outstanding Direct Appointment Policy, u Bah Wailad u la ong ba kane ka policy ka ai jingkular ia ki nongialehkai jong ka Jylla kiba ioh takma ha ki lympung kiba heh bad ka ailad ruh ia ki ban bteng ia ki jingpule.
U la pynbna ruh ba yn ai ka jingiarap pisa sha ka kynhun ba shah jied ban mihkhmat haka National Games ban kyrshan haka por ki don hapdeng k jingshah ai jinghikai pyntbit, bad ba yn buh ïa ki kyndon ba kyrpang hapoh ka Meghalaya Health Insurance Scheme (MHIS) ban pynthikna ïa ka jingsumar na ka bynta kito kiba mynsaw.
Ka nongïalehkai Badminton kaba mihkhmat iaka Assam, ka Ashmita Chaliha kaba dei ka nong India kaba nyngkong eh ban rah ia ka nam lahduh haka Korea Masters Title, ka la wanphai biang ban ïakhun ha Shillong hadien jan shisnem.
Haba kdew ïa ka jingkiew jong ki sap ialehkai hapoh ka thaiñ sahthei lammihngi, ka Ashmita kala ong ba ki nongïalehkai badminton ki donkam ïa ka jinghikai kiba iakot bor bad kiwei ki ri khnang ba maki ruh kin lah ban iakhun pyrshah ia kiwei ki nongialehkai na kylleng ka pyrthei.
U H. Lalthazuala ka jong ka Jylla Mizoram, uba dang rah iaka nam lahduh haka Men’s Singles Title ha Cameroon International 2026 bad uba la long ruh u U-17 national champion, u la pynpaw ïa ka jingshaniah ha ka jingkyrmen jong ka kynhun jong u ban rah ïa ka nam lahduh bad ïaroh ïa ka jingkyrshan jong ka Jylla ïa ki nongïalehkai.
Ha ka jingplie pyrda iaka North East Zone Inter-State Badminton Championship 2026, la don lang ki dkhot ka BAI Tournament Committee Convener Omar Rashid, Director of Sports and Youth Affairs Alertson Nongbri, Deputy Director P. B. War Nongbri, Assistant Director K. Passah, MSBA Senior Vice President C. O. Rangad, MSBA General Secretary Rajesh Kamal, Assam Badminton Association Treasurer Gautam Mahanta bad kiwei kiwei de.
