Shillong, Nailur 16 : Watla katto katne na ki 8 ngut ki MLA ka UDP kila pynbna paidbah ia ka jingthmu ban leit iasoh shen sha ka Bharatiya Janata Party (BJP), u President ka party Bah Metbah Lyngdoh ha ka sngi Balang ula kyntait ban pdiang ia ka, da kaba ong ba kaei kaba jia ka dei khyndiat eh ka jingshisha bad tang ka khubor antad.
“Ki khubor antad kin dei beit ki khubor antad. Ha nga hi nga shim ba ka long kumta- kam dei satia ka jingshisha ne ka bym shisha. Kumta, ka dei mar shiteng ka jingshisha” ong u Bah Metbah haba iakren bad ki nongthoh khubor haba kylli halor kaei ka ban jia ia ki MLA kiba thmu ban phet seng.
U la kubur ba ia kane ka kam lah dep ban iakren hapoh ka party.
“Ngi la dep iakren hapoh ka jingialang ka party ia kane ka khubor antad kaba la iaid mynta la katto katne taiew bad la sngewthuh ba haduh katno kiei kiei ki la long hangta hapoh ka jingpyrkhat jong kito ki MLA kiba kwah ban ïasoh bad kiwei pat ki party,” u la ong.
U President ka UDP u la ong ba ka seng ka pyrshang ban weng ia ki jingartatien bad jingbym iasngewthuh jingmut hapdeng ki dkhot ba la jied, hynrei kam shym la lap ia kano kano ka jingbym sngewhun kaba thikna.
Haba kylli sa katno ngut ki MLA kiba dang don bad u, u bah metbah ula ong ba u dang shim beit ia baroh 12 kum kawei ka kynhun.
“Ha nga hi nga dang shim ia baroh 12 ngut ki MLA ba ngi dang long kawei. Ka jingkylli ba don bad nga ne bym don kam mh satia namar ngi don hapoh kawei ka shatri, hapoh kawei ka tnum bad ngi don hapoh kawei ka party. Ngi la iaid la bun tylli ki snem kum ka party” ula ong.
Halor ki plan ban khang ia ki 8 ngut ki MLA ba kin leit iasoh BJP, u Bah Metbah ula ong ba ka party ka dang iakren bad ki.
