Shillong, Nailur 16 : U President ka United Democratic Party (UDP) Bah Metbah Lyngdoh ha ka sngi Balang ula aiksai ba ka party ka lah ban pynshitom ia u MLA ka West Shillong Bah Paul Lyngdoh namar ki kam ba pyrshah ia ka party, hadien ki jingkren jong u ba dang shen ba buh jingkylli ia ka jinglong nongialam.
Haba kren bad ki nongthoh khubor, u Bah Metbah ula ong ba ka party kala shimkhia ia ki jingkren jong u Bah Paul.
“Uwei na ki MLA ka party ula ai jingkren kaba long pyrshah bha ia ka party bad ngi la shimkhia ia ka bad ngin sa iashong bad peit ia kaei ka rai kum ka party kan sa shim ha kine ki sngi ban wan” ula ong.
U Bah Paul Lyngdoh dang shen ula kam ba ki nongialam barim kum u bah Bindo M Lanong, Bah Jemino Mawthoh bad Bah Ardent Basaiawmoit kila mih na ka UDP hapoh ka jingialam u Bah Metbah Lyngdoh, kaba buh jingkylli ia ka jinglah jong u ban ialam ia ka party.
Haba jubab ia kane, u President ka UDP ula ong “Ngam donkam ban jubab ia kata ka jingkylli. Kan bha shibun ia kiwei ba kin jubab na ka bynta jong nga, lehse kan biang palat. Ha nga ban kren pynksan ialade, Nga sngew ba kiwei kin ym sngew tynnad bad nga ruh ngan kiar ban leh ia kum kane ka kam”.
