Shillong, Nailur 16 : Ka jingialang bala pynlong da u Commissioner & Secretary ka tnad Tourism halor ka Facilitation Centre ha Umling, Ri-Bhoi kam shym la pynhun satia ia ka Khasi Students’ Union (KSU) bad u General Secretary barim Donald V Thabah ula ong ba ka Sorkar kan dang ban pyni ia ka jingshimkhia ha kaban pyntreikam ia ka Meghalaya Residents Safety and Security Act (MRSSA).
“Kila khot ia ngi ban iakren haba iadei bad ka jingbuh ia ka facilitation centre ha Umling kaba dei ka entry point, hynrei ki Ophisar ba don ha ka jingialang ki dei tang na ka tnad Tourism” ong u bah Donald hadien ba wai ka jingialang ha ka sngi Balang.
U iathuh ba ka Tnad Tourism kala batai ia ki jingthmu jong ka na ka bynta ka centre, hynrei ym shym la iakren eiei ia ki jing sngewkhia ba kongsan jong ka KSU.
“Hashuwa ka KSU kala pyrshah ba ka jaka bala buh na ka bynta ka facilitation centre ka long kaba duna palat, hynrei bun na ki jaka la ai pyndonkam sha ka food court. Ngi la pynpaw ia ka jingpyrshah bad ka tnad Tourism ka pyntip sha ngi ba mynshuwa ka jaka bala buh ka long 1000 sqft, mynta kan long 4000 sqft” ong u Bah Donald.
“Ngim lah ban ai ka jingkular ha ki ba ngi la hun bad kaei kaba ka Tnad Tourism ka thmu namar ki nongialam jong ngi ki dang don ha phatok. Ngi hap ban iakren bad ki shuwa, la ka 4000 sqft kala biang ne em ne ngi dang donkam bun” ula ong.
U Bah Donald ula kdew ba ka entry point kam dei satia ban long tang na ka bynta ki nongjngohkai.
“Ngi sngewthuh ba ki briew kiba wan rung sha Jylla kim dei tang ki nongjngohkai, ki dei ki nongbylla, ki samla pule, ki nongtrei Sorkar bad bun kiwei kiwei kiba wan na ka bynta kiwei pat kikam” ula ong.
Ula ong ba ka jaka bala ai mynta ka dang duna bha bad kaba lah shiliang.
“Ngi ioh ba tang 2 tylli ki kamra la ai sha ka tnad Tourism, kawei ia ka Tnad Infiltration bad kawei ia ka Tnad pohiing. Ngi sgew ba ka dang dei ban don sa ki kamra ka tnad Labour, Health, Education bad kiwei ki tnad ruh, namar lada ngi don tang ia ka tnad Tourism, kan sa don ka jingieng lain kaba jrong bha” ong u Bah Donald.
“Hooid, ki lah ban aplai online, hynrei ki don ruh ki bym lah ban leh ia kane, kumta ngi sngew ba baroh kito ki tnad ki dei ban don hangtei. Naba kila khot ia ngi tang na ka tnad Tourism, kila pyntip sha ki ba kim lah ban kren satia na ka bynta kiwei pat ki Tnad” ula bynrap.
Haba khein ia kane ka jingialang ba ka long ka bym seisoh, u Bah Donald ula ong “Kane ka jingialang kam long satia kaba seisoh, ngim hun satia bad ka jingialang namar ki Ophisar kiba don ki dei tang na ka Tnad Tourism”.
Halor ka jingtyrwa ban buh ia ka facilitation centre ha Rattachera, u bah Donald ula ong ba ka Sorkar kala ai ia ka jingtip ka bym pat biang pura.
“Ngi la kylli na ki halor ka Rattachera, kilapyntip sha ngi ba ka kam thied jaka ka dang iaid shakhmat. Ki dang dep tang 50% ka kam hynrei kim shym la pyntip sha ngi ba haduh katno ka heh ka jaka na ka bynta ka facilitation centre. Kumta ngim tip satia la kin pynkylla ne em ia ka sha ka entry-exit facilitation centre” ula ong.
Une u nongialam barim ka KSU ula ong ba ka Sorkar kan hap pynkylla ia ka rukom pyniaid kam bad ban khot ia ka jingiakren kaba bniah halor ka MRSSA, ym ka jingiakren tang bad kawei ka Tnad.
