Shillong, Nailur 16 : U Nongialam ka BJP Bah AL Hek ha ka sngi Balang ula ong ba ka jingthmu iasoh ki 8 ngut ki MLA ka UDP sha ka BJP ka dei kaba la thikna haba pynpaw ba u Myntri kam Pohiing Amit Shah dalade ula ai ia ka dak kaba shai.
“Nga la iakynduh para marwei ia u Myntri kam Pohiing Amit Shah bad ula kren shai ba kane ka dei kaba la thikna” ong u Bah Hek haha bynrap ba ki jingdawa bala buh da ki MLA ka UDP ka dei kaba la kyrshan pura da ka BJP.
U Bah Hek ula pynpaw ba ki mat bala pynsngew da ka UDP ki dei kiba dei hok shisha bad ki dei na ka bynta ka jingmyntoi ka Jylla. “Ha ka jaka ka ILP, ngi lah ban jied noh da ka MRSSA. Ka ktien Khasi ha ka Khyrnit ba Phra ka dei kaba hap pynrung. Baroh kine ngi hap ban burom, kine ki jingdawa ki dei kiba shonghok” ula ong.
“Na ka BJP ruh ngin sa kyntur ia ki. Kine ki jingdawa kin hap ban treikam” ong u Bah Hek.
Une u MLA ka Pynthorumkhrah ula kyntait pat ban kynthoh eiei halor ki jingiakren pynbeit bad ki jing dawa ba shimet jong ki MLA ka UDP.
“Ia kata hi ngam don jingtip. Kane ka dei ka jingiakren bad ki nongialam ha Delhi. Ngim don jingtip satia” ula ong.
Halor ka jingiakren ba iadei bad ka jingiasam ia ka bor bad ka shuki Symbud Myntri Rangbah, u Bah Hek ula ong ba kane ka rai ka shong ha ki nongialam ba hakhlieh.
“Kane ka shong ha ka rai jong u Myntri Rangbah. Ngi hap ban iaid kat kum ka jingpynbeit jong u kum ka paralok ba iatreilang” ula ong.
