Shillong, Nailur 16 : Ka Sorkar Meghalaya kala thung ia ka fact-finding committee halor ka jingthmu ban seng ia ka Shree Cement Company ha East Jaintia Hills bad kala iawer ia ki riewshimet, ki kynhun bad ia ki paitbah ban ai jingkyrshan ia kane ka jingtohkit.
Ia kane ka committee la thung lyngba ka jingpynmih ka sorkar ia ka jingpynbna paitbah ha ka 8 tarik u Nailur, 2026, hadien ba la ioh pdiang ia ka shithi ha ka 3 tarik u Nailur, kaba la bthah ba dei ban pynlong ia ka jingtohkit halor katei ka mat.
Katkum ka jingpynbna paitbah, committee kan eksamin ia ka jinglong jingman kiba iadei bad jingpynthud ia ka public hearing ha ka 31 tarik u Naitung, 2026, ha East Jaintia Hills District, kaba la pynlong da ka Meghalaya State Pollution Control Board.
Kan khmih ia ka jinglah ban shah ktah ka mariang, imlang sahlang, ki kam kiba iadei bad ki aiñ ki kanun, ki bynta kiba iadei bad ki kam sniew bad kam runar na ka jingthmu ban seng ia ka karkhana pynmih dewbilat ha ka district bad ban aiti ia ka kaiphod kaba bniah halor ka jinglap jong ka fact finding committee.
Ka Committee ka lah ruh ban iasyllok, khot ne iakren bad kiba bun balang kum shi bynta jong ka jingtohkit.
La iawer ia ki paitbah bad ia ki riewshimet kiba don ia ka jingsngewkhia ba kin phah ia ki jingthoh ryngkat bad ka ai ia ki jingtipo kiba bniah sha ka committee ha lane shwa ka 29 tarik u Nailur 2026.
Ki paitbah kiba don jingthmu ban wan mih hi dalade hakhmat jong ka Committee ki lah ban wan mih ha ka Hearing, ha kaba ia ka Tarik yn sa pynbna kham hadien.
Ia kane ka committee la khlieh da u Bah C.V.D. Diengdoh, Commissioner and Secretary ka Sorkar Meghalaya.
Ia kino kino ki jingthoh lah ban leit aiti ha ka kamra kaba 320 jongka Meghalaya Secretariat lane ban phah da ka email [email protected].
