Shillong, Nailur 16 : Ka Kynhun Myntri ka Sorkar Jylla ha ka sngi Ba-ar kala ai jingmynjur ia ki jingtyrwa ban pynkha ia ka Dam Safety Organisation ka ban peitthuh laitluid ia ka jinglong ki dam hapoh ka Jylla, ong u Myntri rangbah ka Jylla Conrad K Sangma.
U Conrad ula iathuh ba kane ka rai ka long kat kum ka Standard Operating Procedure bala buh da ka Ministry of Jal Shakti, kaba byhaj ia ki Jylla ba kin don ia ki rukom treikam kaba kyrpang na ka bynta ka jingshngain jong ki dam.
U Myntri Rangbah ula ong ba ka Jylla ka don haduh 12-13 tylli ki dam, ha kaba bun ki dei kiba pyniaid da ka MeECL bad kawei da ka tnad PHE, bad ia ka safety audit haduh mynta laleh da kine hi ki bor ba pyntreikam ia ki.
U iathuh ba ka Sorkar Pdeng kala kdew ba kane ka long ka bym iahap satia.
“Ki briew kila pyniaid kam ia ki dam ki dei ruh kiba peit ia ka jingshngain ki dam, ia kaba ka Sorkar India ka sngew ba kam long kaba dei” ong u Conrad.
Ula bynrap ba ka bor treikam ba thymmai kan don ia ki Ophisar ba laitluid ki ban pyntreikam pyrrkhing bha ia ki SOP ban leit khmih bniah man ka por bad pynneh ia ka jingshngain jong ki dam.
