Shillong, Nailur 14: Ka kynhun ki nongialehkai athletic jong ka Ri Bhoi district, ki la lah ba kin lam khmat ha ka liang jong ka jingioh ban khur ia ki takma, ha ka sngi ba sdang ka lympung Meghalaya State Senior Athletics Championship, ba pynlong ha SAI, STC, NEHU, Umshing, Mawkynroh hynne ka sngi Nyngkong.
Ia kane ka lympung ialehkai ba lai sngi la pynlong da ka Meghalaya Athletic Association (MAA) ia kaba la wan ban iarap lang da ki briew ka Athletics Federation of India (AFI) ha kaba la pynlong haduh 34 tylli ki jait jingialehkai ne events, ha kaba ka thong jong ka jingpynlong ia kane ka lympung ka long kum shi bynta ban wad bniah ia ka sap ka talen ba tbit ki khynnah ban sain dur ia ki kum shi bynta ba kin ioh ia ka kabu ban mihkhmat ia ka jylla ha ka por ba kan pynlong ia ka National Games ha u snem ban wan.
Tad haduh ba kut jong ka sngi kaba nyngkong, ka kynhun ki rang bad thei ialehkai ka Ri-Bhoi ki la lah lypa ban khur haduh 6 tylli ki takma ksiar bad mar kawei ka takma Rupa bad Rnong, katba ka district ba don ha ka kyrdan kaba ar dei ka Eastern West Khasi Hills District, kiba la ioh ba kin khur 2 tylli ki takma ksiar, 1 ka takma rupa bad 2 tylli ki takma rnong.
Ka district ba don ha ka kyrdan kaba lai dei ka West Jaiñtia Hills District kaba la ioh ba kan hur 1 ka takma ksiar, 3 tylli ki takma rupa, katba ka kynhun ka West Khasi Hills ka don ha ka kyrdan kaba saw hadien ba ka la ioh ba kan khur 1 takma ksiar, 2 ki takma rupa bad 3 tylli ki takma rnong, bad ka kynhun ka East Khasi Hills ka don ha ka kyrdan kaba san hadien ba ka la lah shwa ba kan ioh khur tang 1 ka takma ksiar bad kawei ka takma rnong.
Ia kane ka lymnpung ialehkai kaba lai sngi, la leit ban plie u bah Alertson Nongbri ba dei u Director jong ka tnat Sports & Youth Affairs, ha kaba la synran lang ia u da u Dy Director ka tnat u bah P.B War Nongbri.
Ha kane ka lympung ialehkai ba lai sngi, ki nongwan iashim bynta baroh ki long 267 ngut, katta 166 ngut ki khynnah shynrang bad 101 ngut ki khynnah kynthei.
Ki kato katne ki rang bad thei ialehkai ba la ioh ba kin ia khur ia la ki takma ha ka sngi ba sdang kane ka lympung ki long ka Monlangki Kyndait ka West Jaiñtia Hills ba la khur ia ka takma ksiar ha ka iakob mareh 1500m hadien ba la pyndep ia ka thong ha ka 25.86 sekon, katba u Marshal Wanniang ka Eastern West Khasi Hills u la khur ia ka takma ksiar hadien ba u la pyndep ia ka thong ha ka 4 minit 8.29 sekon.
Katba ha ka iakob mareh ba 100M ki kynthei bad shynrang ia ki takma ksiar la khur ia ki da ka Phibakmen Rynghang bad u Banraplang Lapang baroh arngut ba dei na Ri Bhoi District hadien ba ki la pyndep ia ka thong ha ka 13.07 sekon bad 11.02.
