Shillong, Jylliew 18 : Ka Mawkhar watla ka dang rung thymmai ha ka lympung heh jong ka Shillong Premier League pynban ka la lah ban pyniakhaid ia ka kynhun ba khlain bor jong ka Rangdajied United FC kaba long ha kane ka sngi Saitjain ha madan ialehkai Third Ground, Polo.
Ha ka jingiakhun kaba itynnad bha ha ka kylla step, dei ka Mawkhar kaba ioh ban thep nyngkong ha ka minit kaba 26 lyngba u Bansanbha Khongsdam. Hynrei tang hadien lai minit ei ei, ka Rangdajied United FC ka la ioh ban pynphai noh bad pyniakhaid ia ka jingiakhun da mar 1-1 kol lyngba u Chesterpaul Lyngdoh.
Ka jingialehkai ha ka kylla miet ka la kham shongshit khyndiat hadien ba ka Rangdajied ka la ioh bun tylli ki kabu ksiar tangba ym don kawei ruh kaban pynkhih ia ka jar jong ka Mawkhar bad kane ka la iai bteng tad haduh ban da kut ka por ialehkai.
Ka jingiakhun hapdeng kitei ki ar kynhun kadei ruh ka jingialehkai ba khatduh jong ka kylla ba nyngkong ha ka Shillong Premier League.
Kumban shu phaidien khyndiat, ka Rangdajied United FC kaba dei ka kynhun kaba wan ba ar ha ka lympung jong u snem 2019 ka don bunbha ki rangialehkai ba kynsai kynthup naduh u Chesterpaul Lyngdoh kumjuh ruh u Aiborlang Khongjee nangta u Samuel Shadap nalor kiwei kiwei.
Ka jingiakhun kaba bud pat kaban long ha ka sngi Ba-ar, ha kaba ka Mawlai SC kan hap ban iakhun pyrshah ia ka Shillong Lajong.
