Ha u Risaw lah ban wanrah ia ka Agriculture Policy
Shillong, Nailur 14 : Ka Hill Farmers Union (HFU) ha ka sngi Nyngkong kala byrngem ba kan nym shu sngap jar lada ka Sorkar ka kyntait ban siew bai lutksan ia ki nongri sniang kiba shah ktah na ka jingpang African Swine Flu (ASF), watla u Myntri Rangbah Conrad K Sangma ula pynpaw ia ka jingeh ban ai bai lutksan bad ban map ia ki ram bala shim hapoh ka Piggery Mission.
Ka jingalang hapdeng u Myntri Rangbah bad ka HFU ba ialam da u President Comander Shangpliang, kala urlong da ki sngi hadien ba kane ka seng kala pynlong ia ka jingiaid paidbah ryngkat ki khun sniang hapoh ka nongbah ba dawa ban leh eiei halor ka jinglynshop ka ASF.
“Ngi la pynlong dang shen ia ka rally ba jai jai haba iadei bad ka jinglynshop ka ASF. Hadien kane, la khot iakren ia ngi na ka Ophis u Myntri Rangbah bad iakynduh ia u.Ngi la iakren ia ki mat ba kynthup ia ka jingpyntreikam thikna ia ki checkpoint, buh ia ki health checkup bad quarantine centre, siew bai lutksan bad map ia ki ram hapoh ka piggery mission” ong u Bah Commander haba iakren bad ki nong thoh khubor hadien ka jingialang.
U iathuh ba u Myntri Rangbah ula pynpaw ba ka Sorkar kan sa khmih halor ka jingbuh ia ki checkpoint bad health checkup bad quarantine centre, watla um shym la ai ia ka jingkular ba thikna.
“Halor ki checkpoints bad quarantine centre, u khlem ai satia ia kano kano ka jingkular hynrei ngi lah ban sngewthuh ba u Myntri Rangbah un sa leh ia kaba donkam” ong u Bah Commander.
Halor ka jingsiew bai lutksan bad map ia ka ram, une u nongialam ka HFU ka ong ba u Myntri Rangbah ula pynpaw ia ka jingeh.
“Ula pyni ia ka jingeh ban siew bai lutksan bad map ia ka ram, hynrei ula ong ba un sa iakren bad ki Ophisar jong ka Tnad” ong u Bah Commander.
Hynrei ula ong ba ka seng kala kren shai ba kan ym shu sngap jar lada kyntait ban ai ia ka bai lutksan.
Haba kynnoh ba ka jinglynshop ka ASF ka dei namar ka jingwan pynpoi khlem da khmih bniah ia ki sniang nabar ka Jylla, ula kynnoh ba namar ka jingbym don ka checkpoint ba thikna jong ka Tnad Veterinary, ia ki sniang la pynrung sha jylla khlem da khmih bniah ia ka koit ka khiah jong ki.
“Ngi sngew ba kane ka jinglynshop kadei namar ki sniang ba wanrah na shabar ka jylla khlem da khmih bniah ia ka koit ka khiah. Jin da ka don ka jingkhmih bniah, ia ki sniang ba pang yn jin da lap bad set quarantine ia ki. Namar ka jingbym don kine ki checkpoint, ki Pulit kila talasi bad lum pisa bad shah rung laitlan ia ki sniang khlem da khmih ia ka koit ka khiah” ula ong.
Ka kynhun kala iakren ruh halor ka kam ba iadei bad ka Agriculture Policy, ia kaba u Myntri Rangbah ula pyntip ba ka draft policy kala don hapoh ka website jong ka Sorkar ban ioh ia ki jingai jingmut na u paidbah.
“Ngin sa phah ia ki jingai jingmut jong ngi bad ngi kyrpad ia baroh ki nongrep ba kin pule ia kane ka draft bad phah ia ki jingai jingmut sha ka Tnad” ong u Bah Commander haba pyntip ba u Myntri Rangbah ula iathuh ba ia kane ka policy lah ban mynjur ha u bnai Risaw mynta u snem.
