Tura, Nailur 14 : Ka Meghalaya Board of School Education (MBoSE) kala pynbna ban pynlong ia ka eksam jong ka Secondary School Leaving Certificate (SSLC) 2026-27 naduh ka 4 tarik Nohprah bad kut ha ka 16 tarik Nohprah.
Ka eksam kan long naduh ka por 10 baje mynstep haduh 1 baje janmiet ha baroh kine ki sngi long eksam.
Kat kum ka prokram bala pynmih da ka MBoSE ha Tura, ka eksam kan sdang da ka English ha ka 4 tarik Nohprah bad bud da ka science ha ka 7 tarik Nohprah.
Ka Indian Languages bad Additional English kan long ha ka 9 tarik Nohprah. Ka Indian language ka kynthup ka Garo, Khasi, Hindi, Bengali, Assamese, Nepali, Urdu bad Mizo.
Ka Health and Physical Education, Computer Science bad Vocational Subject kan long ha ka 11 tarik Nohprah.
Ka Social Science kan long ha ak 14 tarik Nohprah katba ka Mathematics bad Special Mathematics kan long ha ka 16 tarik Nohprah.
Na ka byna ki vocational subjects, ka Board kala buh ia ka Beauty bad Wellness, Tourism, Health Care, Electronics, Agriculture, ITES, Apparels, Plumbing, Food Processing, Telecom, Banking bad Automobile Repair. Ia kine la tyrwa ban bujli ha ka jaka jong ka Computer Science lane Health and Physical Education.
Ka MBoSE ka ong ba ki examination hall kin plie ha ka por 9:30 baje mynstep. Ia ki jingkylli yn san ha ka por 9:45 baje mynstep bad ia ka answer script yn am ha ka por 9:50 baje mynstep. Ki khynnah kin sdang thoh ha ka por 10 baje mynstep.
Ka theory eksam na ka bynta vocational subject kan long shikynta naduh ka por 10 baje mynstep haduh 11 baje mynstep.
Ka Board ka ong ba ia kane ka prokram eksam lah ban pynkynriah lada don kino kino ki jingjia ki bym lah ban tip lypa lane iatakhuh sngi bad kino kino ki jingpynbna ba kong da ka Sorkar Jylla ne Sorkar Pdeng.
Ia kane ka prokram eksam la pynlait da u Bah T.R. Laloo, Director of Accreditation and Controller of Examinations, MBOSE.
